ایران: سیستان بلوچستان میں جیش العدل کے ساتھ جھڑپ، پولیس اہلکار ہلاک

تہران (ڈیلی اردو) ایران کے شورش زدہ جنوب مشرقی صوبے سیستان بلوچستان میں مسلح شدت پسندوں اور سکیورٹی فورسز کے درمیان جھڑپ میں ایک پولیس اہلکار ہلاک اور ایک زخمی ہو گیا۔

ایرانی خبر رساں ادارے فارس کے مطابق جھڑپ ایران شہر میں اس وقت ہوئی جب مقامی پولیس کا مسلح شدت پسندوں سے سامنا ہوا۔ فائرنگ کے تبادلے میں متعدد حملہ آور زخمی ہوئے اور جائے وقوعہ سے فرار ہو گئے، جن کی تلاش جاری ہے۔

یہ صوبہ ایران کے پسماندہ ترین علاقوں میں شمار ہوتا ہے جہاں بلوچ باغیوں اور سنی شدت پسند گروہوں کے ساتھ سکیورٹی فورسز کی جھڑپیں عام ہیں۔ یہاں بڑی تعداد میں بلوچ نسلی آبادی رہتی ہے جن میں اکثریت سنی مسلمانوں کی ہے، جبکہ ایران کی مجموعی آبادی میں اکثریت شیعہ مسلک سے تعلق رکھتی ہے۔

بعد ازاں سنی شدت پسند گروہ جیش العدل نے اس حملے کی ذمہ داری قبول کر لی۔ یہ گروہ حالیہ برسوں میں صوبہ سیستان بلوچستان میں متعدد حملوں کی ذمہ داری قبول کر چکا ہے۔ ایران کا الزام ہے کہ جیش العدل کی موجودگی پاکستانی علاقوں میں ہے اور وہ سرحد پار سے کارروائیاں کرتا ہے۔

رواں سال 26 جولائی کو اسی صوبے میں جیش العدل کے ایک اور حملے میں کم از کم چھ افراد ہلاک ہوئے تھے، جب کہ نشانہ ایک مقامی عدالت تھی۔