ایران: عالمی شہرت یافتہ پہلوان نوید افکاری کو پھانسی دیدی گئی

تہران (ڈیلی اردو/وی او اے) ایران نے عالمی اپیلوں کے باوجود قتل کے الزام میں قید عالمی شہرت یافتہ پہلوان نوید افکاری کو پھانسی دے دی ہے جس پر عالمی سطح پر شدید ردعمل سامنے آیا ہے۔

امریکی صدر ڈونلڈ ٹرمپ اور ریسلنگ کی عالمی تنظیم ‘یو ایف سی’ کی طرف سے ایران سے نوید افکاری کو پھانسی نہ دینے کی اپیل کی گئی تھی۔

ایران کے سرکاری میڈیا کے مطابق اُنہیں جنوبی شہر شیراز میں پھانسی دی گئی۔

ستائیس سالہ نوید افکاری پر الزام تھا کہ انہوں نے 2018 میں ہونے والے مظاہروں کے دوران ایک سیکیورٹی گارڈ کو قتل کیا تھا۔ ان کے وکیل اور اہل خانہ کا کہنا ہے کہ وہ مظاہروں میں پُر امن احتجاج کرہے تھے اور ان پر تشدد کر کے اعتراف جرم کرایا گیا۔

تاہم ایرانی حکام نے نوید افکاری پر تشدد کے الزامات کی تردید کی تھی۔

اس مقدمے میں نوید افکاری کے دو بھائیوں وحید اور حبیب کو بالترتیب 54 اور 27 سال قید اور 74 کوڑے مارنے کی سزائیں بھی سنائی گئی تھیں۔

انسانی حقوق کی عالمی تنظیم ایمنسٹی انٹرنیشنل نے نوید افکاری کو پھانسی دیے جانے کی مذمت کی ہے۔

#Iran: We are completely shocked, saddened & horrified at the secret execution of Navid Afkari, a young man with a promising future ahead of him. This travesty of justice needs immediate int'l action through public & private interventions.https://t.co/lxAQ3sIDKG #نوید_افکاری

— Amnesty International (@amnesty) September 12, 2020

تنظیم نے اپنے بیان میں کہا ہے کہ نوید افکاری کا مستقبل روشن تھا۔ لیکن اُنہیں جس طرح پھانسی دی گئی یہ انصاف کے ساتھ مذاق ہے جس پر عالمی سطح پر ایکشن لیا جانا ضروری ہے۔

نوید افکاری کو سزائے موت سے بچانے کے لیے امریکی صدر ٹرمپ نے بھی اپیل کی تھی۔

چند روز قبل اپنی ٹوئٹ میں صدر نے کہا تھا افکاری کا جرم حکومت مخالف مظاہروں میں شریک ہونا تھا۔ وہ ایران میں ابتر معاشی صورتِ حال اور مہنگائی کے خلاف احتجاج کر رہے تھے۔

…To the leaders of Iran, I would greatly appreciate if you would spare this young man’s life, and not execute him. Thank you! @UFC @DanaWhite @FoxNews https://t.co/NkJb4IsQpt

— Donald J. Trump (@realDonaldTrump) September 3, 2020

یو ایف سی کے صدر ڈانا وائٹ نے ایک ویڈیو پیغام میں کہا تھا کہ نوید افکاری پر امن احتجاج میں شریک تھے جنہیں ایران میں پھانسی دی جا رہی ہے۔

ویڈیو میں ڈانا وائٹ کا مزید کہنا تھا کہ سب سے پہلے تو وہ ایک انسان ہیں اور وہ ہم میں سے ایک ہیں۔

Iran, please spare Navi’s Afkarai ???????? #SaveNavid pic.twitter.com/HMeZA1yFup

— danawhite (@danawhite) September 4, 2020

ان کا مزید کہنا تھا کہ وہ صرف یہ کر سکتے ہیں کہ ایرانی صدر کو فون کریں تاکہ وہ افکاری کی مدد کرسکیں۔

نوید افکاری کو پھانسی دیے جانے پر کھیلوں کی کئی تنظیموں نے بھی مذمت کی ہے۔

انٹرنیشنل اولمپک کمیٹی نے بھی نوید افکاری کو پھانسی دیے جانے کو افسوس ناک قرار دیا ہے۔