ایران میں عسکریت پسندوں کے حملے میں دو پاکستانی مزدور ہلاک

اسلام آباد / زاہدان (ڈیلی اردو رپورٹ) ایران کے سرحدی شہر سرباز میں دو پاکستانی مزدور نامعلوم عسکریت پسندوں کے حملے میں ہلاک ہو گئے۔ ہلاک ہونے والوں کا تعلق احمد پور شرقیہ اور کراچی سے بتایا جاتا ہے۔

اطلاعات کے مطابق دونوں پاکستانی ایران میں حجام کی دکان پر محنت مزدوری کرتے تھے۔ ہلاک ہونے والوں کی شناخت مجاہد اور محمد فہیم کے ناموں سے ہوئی ہے۔

بہاولپور سے تعلق رکھنے والے مجاہد کے بھائی نے میڈیا کو بتایا کہ اُس کا بھائی کئی سال سے ایران میں مزدوری کر رہا تھا۔ گزشتہ رات نامعلوم افراد نے اُسے ہلاک کرنے کے بعد واقعے کی ویڈیو بھی گھر والوں کو ارسال کی۔

دوسری جانب محمد فہیم کے بھائی فاروق کا کہنا ہے کہ ملزمان نے پہلے اُس کے بھائی کو اغوا کیا اور بعدازاں تاوان کا مطالبہ کیا تھا۔ اہل خانہ نے حکومت پاکستان سے مطالبہ کیا ہے کہ فوری طور پر لاشوں کی واپسی کے لیے اقدامات کیے جائیں۔

واضح رہے کہ دو ماہ قبل بھی ضلع بہاولپور سے تعلق رکھنے والے آٹھ مزدوروں کو ایران کے علاقے مہرستان میں نامعلوم مسلح افراد نے ہلاک کر دیا تھا۔ ان مزدوروں کو مبینہ طور پر ایک ورکشاپ میں ہاتھ پاؤں باندھ کر گولی مار کر ہلاک کیا گیا تھا، جو پانچ سال سے مقامی مکینک کے طور پر کام کر رہے تھے۔

ان تمام واقعات کے بعد ایران میں محنت مزدوری کرنے والے پاکستانیوں کی سلامتی پر شدید تحفظات جنم لے رہے ہیں، جبکہ زاہدان میں موجود پاکستانی قونصل خانہ متوفیوں کی میتوں کو وطن واپس بھجوانے کے لیے متعلقہ ایرانی حکام سے رابطے میں ہے۔