ایل او سی پر بھارتی شیلنگ: آزاد کشمیر میں 17 پاکستانی ہلاک، 51 زخمی, 139 مکانات تباہ یا متاثر

مظفرآباد (ڈیلی اردو رپورٹ) پاکستان کے زیر انتظام کشمیر میں حکام نے تصدیق کی ہے کہ گزشتہ چند روز کے دوران بھارتی افواج کی فائرنگ اور شیلنگ سے کم از کم 17 شہری ہلاک اور 51 زخمی ہو چکے ہیں۔

سرکاری اعداد و شمار کے مطابق، جمعرات 8 مئی کو ہونے والے ایک بڑے واقعے میں 6 افراد ہلاک اور 29 زخمی ہوئے۔ ہلاک ہونے والوں میں دو خواتین شامل ہیں، جن کا تعلق کوٹلی (4)، بھمبر (1) اور باغ (1) سے تھا۔ زخمی افراد میں 9 خواتین اور 3 بچے بھی شامل ہیں، جن کا تعلق کوٹلی، بھمبر، باغ، نیلم، پونچھ اور حویلی سے ہے۔

محکمہ صحت آزاد کشمیر کے مطابق، بدھ 7 مئی سے جاری کشیدگی کے دوران مجموعی طور پر 17 افراد ہلاک ہوئے، جبکہ 139 رہائشی مکانات، مساجد، اسکولز اور کالجز کو مکمل یا جزوی نقصان پہنچا ہے۔ صرف دو دنوں میں 12 مکانات مکمل تباہ ہو چکے ہیں۔

سب سے زیادہ متاثرہ علاقے پونچھ، کوٹلی اور باغ بتائے گئے ہیں جہاں شہری آبادی براہ راست نشانہ بنی۔ متاثرہ علاقوں میں امدادی سرگرمیاں جاری ہیں تاہم کئی دیہی علاقوں تک رسائی محدود ہے۔

یہ پیش رفت ایسے وقت میں سامنے آئی ہے جب پاکستان اور بھارت کے درمیان کشیدگی اپنے عروج پر پہنچ چکی ہے۔ سرحدی جھڑپوں کے ساتھ ساتھ ڈرون حملے، فضائی خلاف ورزیاں اور جوابی دعوے دونوں طرف سے سامنے آ رہے ہیں۔

پاکستانی حکام کے مطابق ان جھڑپوں میں بھارتی فوج کو بھی بھاری نقصان اٹھانا پڑا ہے، تاہم بھارت ان دعوؤں کی تردید کر رہا ہے۔

عالمی برادری، خاص طور پر اقوام متحدہ، چین اور امریکہ، نے فوری تحمل اور سفارتی بات چیت پر زور دیا ہے۔