باجوڑ میں سکیورٹی کارروائی، مولوی فقیر محمد کے بیٹے سمیت 3 دہشت گرد ہلاک

واشنگٹن (ش ح ط) پاکستان اور افغانستان کی سرحد کے قریب خیبر پختونخوا کے قبائلی ضلع باجوڑ کی تحصیل ماموند میں گزشتہ رات سکیورٹی فورسز کی ایک کارروائی کے دوران تحریک طالبان پاکستان (ٹی ٹی پی) سے وابستہ تین دہشت گرد مارے گئے ہیں۔

کالعدم ٹی ٹی پی نے بھی اپنے ایک بیان میں تین افراد کی ہلاکت کی تصدیق کی ہے، جن میں سے دو کی شناخت عبدالرحمٰن اور درویش کے نام سے کی گئی ہے۔

ڈیلی اردو کو معتبر سرکاری ذرائع نے بتایا ہے کہ مارے جانے والوں میں کالعدم ٹی ٹی پی کے سینئر رہنما مولوی فقیر محمد کا بیٹا بھی شامل ہے، جو فورسز کی کارروائی میں ہلاک ہوا۔

دوسری جانب، ٹی ٹی پی سے منسلک سوشل میڈیا اکاؤنٹس پر دعویٰ کیا جا رہا ہے کہ تیسرا مارا جانے والا جنگجو مولوی فرید اللہ ہے، جو مولوی فقیر محمد کا بیٹا ہے۔ تاہم اب تک نہ ٹی ٹی پی کی مرکزی قیادت اور نہ ہی کسی آزاد ذریعے سے مولوی فریداللہ کی ہلاکت کی باضابطہ تصدیق ہو سکی ہے۔

واضح رہے کہ مولوی فقیر محمد، جو کبھی ٹی ٹی پی کے نائب سربراہ بھی رہ چکے ہیں، طالبان کے افغانستان پر قبضے کے بعد افغان جیل سے رہا کر دیے گئے تھے اور وہ طویل عرصے سے تنظیم کی قیادت میں اہم کردار ادا کرتے آ رہے ہیں۔