بحرین نے ایران کی حمایت کے الزام میں 69 افراد کی شہریت منسوخ کر دی

منامہ (ڈیلی اردو) بحرین نے ایران کی حمایت کے الزام میں 69 افراد اور اہلِ خانہ کی شہریت منسوخ کر دی۔

بحرینی وزارتِ داخلہ کے مطابق یہ اقدام اُن افراد کے خلاف کیا گیا جنہوں نے ایران کے مبینہ معاندانہ اور مجرمانہ اقدامات کی حمایت یا تعریف کی۔ وزارت نے کہا کہ فیصلہ متاثرہ افراد کے زیرِ کفالت اہلِ خانہ پر بھی لاگو ہوگا۔

وزارتِ داخلہ نے سوشل میڈیا پلیٹ فارم ایکس پر بیان میں کہا کہ اب تک اس فیصلے کے تحت مجموعی طور پر 69 افراد متاثر ہوئے ہیں۔

یہ پیش رفت ایسے وقت میں سامنے آئی ہے جب ایران اور امریکہ کے درمیان جنگ کے دوران خلیجی ممالک بھی کشیدگی کی لپیٹ میں آئے ہیں۔ رپورٹ کے مطابق ایران نے بحرین کو بھی نشانہ بنایا، جو امریکہ اور اسرائیل کی جانب سے ایران پر فضائی حملوں کے ردعمل کا حصہ تھا۔

بحرین ان خلیجی ممالک میں شامل ہے جہاں جنگ کے دوران ایرانی حملوں سے متعلق معلومات کو سختی سے کنٹرول کیا گیا اور حملوں کی ویڈیوز بنانے والے مقامی و غیر ملکی افراد کو گرفتار کیا گیا۔

بحرین میں آبادی کی اکثریت شیعہ ہے اور تنازع کے ابتدائی مرحلے میں ایران کے حق میں مظاہرے بھی دیکھنے میں آئے تھے۔ 

حکام نے متعدد مظاہرین اور ویڈیوز بنانے والوں کو گرفتار کر کے ان پر سوشل میڈیا کے غلط استعمال، اشتعال انگیزی، نفرت پھیلانے اور غداری جیسے الزامات عائد کیے۔

انسانی حقوق کی تنظیموں نے بحرین، کویت، متحدہ عرب امارات اور قطر جیسے ممالک میں شہریت منسوخی کے قوانین پر تنقید کرتے ہوئے کہا ہے کہ ایسے اقدامات اختلافِ رائے دبانے اور ناقدین کو سزا دینے کے لیے استعمال ہوتے ہیں۔