بلوچ عسکریت پسندوں کا پنجگور میں حملہ، تھانہ نذر آتش، اسلحہ لوٹ لیا

کوئٹہ (ڈیلی اردو) پاکستان کے شورش زدہ صوبے  بلوچستان کے ضلع پنجگور کے علاقے حاجی شہر میں بلوچ عسکریت پسندوں نے لیویز فورس کے تھانے پر حملہ کر کے اسے نذر آتش کر دیا۔

پولیس نے اس حملے کی تصدیق کرتے ہوئے بتایا کہ مسلح افراد نے لیویز تھانے پر دھاوا بول کر اہلکاروں کو یرغمال بنایا اور ان سے اسلحہ چھین کر نامعلوم مقام کی جانب روانہ ہو گئے۔

پولیس کے ایک سینیئر اہلکار نے نام ظاہر نہ کرنے کی شرط پر بتایا کہ مسلح افراد نے حاجی شہر میں ناکہ بندی بھی کی، لیکن وہ زیادہ دیر نہیں ٹہرے اور تقریباً بیس منٹ کے بعد وہاں سے روانہ ہو گئے۔ اس دوران انہوں نے تھانے کو مکمل طور پر نذر آتش کر دیا۔

کالعدم بلوچ لبریشن فرنٹ نے اس حملے کی ذمہ داری قبول کرلی ہے۔ 

حکام نے علاقے میں سیکیورٹی سخت کر دی ہے اور حملہ آوروں کی تلاش کے لیے آپریشن جاری ہے۔