بلوچستان: بی ایل اے کے حملوں میں تین پاکستانی فوجی ہلاک

کوئٹہ (ڈیلی اردو) صوبہ بلوچستان کے ضلع بولان میں علیحدگی پسند تنظیم بلوچستان لبریشن آرمی (بی ایل اے) کے حملوں میں تین سیکورٹی اہلکار ہلاک ہو گئے۔

ذرائع کے مطابق جمعرات کے روز ضلع بولان کے علاقے پیر اسماعیل میں علیحدگی پسند تنظیم بلوچستان لبریشن آرمی (بی ایل اے) نے پاکستانی سیکیورٹی فورسز کو آئی ای ڈی حملوں میں نشانہ بنایا، پہلا حملہ فوج کے قافلے میں شامل اہلکاروں پر کیا گیا۔ دھماکے کے نتیجے میں ایک اہلکار موقع پر ہلاک جبکہ ایک زخمی ہوا۔

بی ایل اے کے علیحدگی پسندوں نے مذکورہ مقام پر پہنچنے والے پاکستانی فوج کے مزید نفری کو بھی آئی ای ڈی حملے میں نشانہ بنایا۔ جس کے نتیجے میں پاکستانی فوج کے بم ڈسپوزل اسکواڈ کے دو اہلکار ہلاک اور ایک زخمی ہوا۔

ذرائع کا کہنا ہے کہ مذکورہ حملوں میں پاکستانی فوج کے نائیک امان اللہ، سپاہی محمد طفیل اور سپاہی ابراہیم کھوسہ ہلاک ہوئے ہیں۔ ابراہیم کھوسہ کا تعلق نصیر آباد سے بتایا جاتا ہے۔

ترجمان بلوچ لبریشن آرمی جیئند بلوچ کے مطابق علیحدگی پسندوں نے پاکستانی فوج کے ساتھ شاہرگ میں بدھ کی رات ایک جھڑپ بھی ہوئی جس میں فوج کو بھاری جانی اور مالی نقصان اٹھانا پڑا۔