بلوچستان: تربت میں ریجنل الیکشن کمشنر کے دفتر پر حملہ، ایک پولیس اہلکار ہلاک

کوئٹہ (ڈیلی اردو) صوبہ بلوچستان کے ضلع کیچ کے ڈسٹرکٹ ہیڈکوارٹرز تربت میں ریجنل الیکشن کمشنر آفس میں نامعلوم مسلح افراد کی فائرنگ اور دستی بم حملے میں ایک پولیس اہلکار ہلاک ہوگیا۔

سینئر سپرنٹنڈنٹ پولیس (ایس ایس پی) کیچ ضیا مندوخیل نے صحافیوں کو بتایا کہ زراعت کالونی تربت میں واقع ریجنل الیکشن کمشنر کے دفتر میں نامعلوم مسلح افراد نے داخل ہونے کی کوشش کی۔

پولیس حکام کا کہنا ہے کہ نامعلوم مسلح افراد نے الیکشن کمیشن کے دفتر کے اندر دستی بم پھینکا۔ تاہم الیکشن کمیشن کے ریجنل دفتر کے احاطے میں دستی بم حملے میں کوئی جانی نقصان نہیں ہوا۔

انہوں نے مزید بتایا کہ مسلح افراد اور پولیس کے درمیان فائرنگ کا تبادلہ بھہ ہوا جس میں ایک پولیس اہلکار نمروز ہلاک ہوگیا جبکہ ملزمان فرار ہونے میں کامیاب رہے۔

پولیس نے ملزمان کی تلاش کے لیے کارروائی کا آغاز کردیا ہے۔

اُدھر نگران وزیر اعلیٰ بلوچستان علی مردان خان ڈومکی نے ریجنل الیکشن کمشنر آفس تربت میں فائرنگ کے واقعہ کی مذمت کرتے ہوئے محکمہ داخلہ سے رپورٹ طلب کی۔

علی مردان خان ڈومکی نے اپنے بیان میں کہا کہ ’ واقعہ قابل مذمت اور پرامن انتخابی عمل میں رخنہ ڈالنے کی سازش ہے، تربت میں الیکشن کمشنر کے دفتر پر فائرنگ کا مقصد خوف و ہراس پھیلانا ہے‘۔

انہوں نے کہا کہ عوام اور امیدواروں کو پرامن اور سازگار ماحول کی فراہمی ہر صورت یقینی بنائیں گے۔

دوسری جانب بلوچستان کے علاقے ڈیرہ بگٹی کی تحصیل سوئی میں ٹائم ڈیوائس دھماکا ہوا جس کے نتیجے میں دو افراد زخمی ہوگئے۔