بلوچستان: قلات میں عسکریت پسندوں کے سنائپر حملے میں 2 کمانڈوز سمیت 6 اہلکار ہلاک

واشنگٹن (ش ح ط) پاکستان کے شورش زدہ صوبے بلوچستان کے ضلع قلات کے علاقے منگوچر میں پاکستانی فورسز کے قافلے پر ایک گھات میں کیے گئے حملے کے نتیجے میں دو کمانڈوز سمیت چھ اہلکار ہلاک ہوگئے۔

سیکورٹی ذرائع کے مطابق قلات کے نواحی علاقے خالق آباد میں بلوچ عسکریت پسندوں نے سنائپر گنز سے پاکستانی فوج پر حملہ کیا، جس کے دوران تین گاڑیاں شدید نقصان پہنچیں۔

سرکاری ذرائع کے مطابق ہلاک ہونے والے اہلکاروں میں نائیک طارق، سپاہی مزمل، سپاہی فراز، سپاہی اعظم نواز، لانس نائیک شاہجہان اور سپاہی آبشار شامل ہیں۔

ابتدائی اطلاعات کے مطابق حملہ ماہر نشانہ بازوں نے منظم انداز میں کیا، جس کے بعد علاقے میں شدید فائرنگ کا تبادلہ ہوا۔ مقامی ذرائع کے مطابق تمام داخلی و خارجی راستے بند کر دیے گئے ہیں۔

پاکستانی فوج کے شعبہ تعلقاتِ عامہ آئی ایس پی آر نے تاحال اس واقعے پر کوئی بیان جاری نہیں کیا۔

تاہم سیکورٹی، پولیس اور دیگر اداروں کے بلوچستان میں تعینات عہدے داروں نے واقعے کی تصدیق کر دی ہے۔

قافلے پر حملے میں ہلاک ہونے والوں کی لاشوں کو ہیلی کاپٹر کے ذریعے ہسپتال منتقل کر دیا گیا ہے۔

بعد ازاں کالعدم بلوچ لبریشن آرمی (بی ایل اے) نے اس حملے کی ذمہ داری قبول کرنے کا دعویٰ کیا ہے۔