بلوچستان میں دہشت گردی کی نئی لہر، مچھ میں 7 سیکیورٹی اہلکار ہلاک، پشین، گوادر اور خضدار میں حملے

کوئٹہ (ڈیلی اردو رپورٹ) بلوچستان ایک بار پھر دہشت گردی کی لپیٹ میں ہے، جہاں مختلف اضلاع میں سیکیورٹی فورسز پر حملوں اور بم دھماکوں کے نتیجے میں 7 اہلکار ہلاک جبکہ متعدد زخمی ہو گئے ہیں۔ بعض علاقوں میں سیکیورٹی فورسز نے بروقت کارروائی کرتے ہوئے ممکنہ تباہی کو روک لیا۔

مچھ، ضلع کچھی

ضلع کچھی کے علاقے مچھ میں سیکیورٹی فورسز کی گاڑی کو ایک دیسی ساختہ بم (IED) سے نشانہ بنایا گیا۔ دھماکہ اس وقت ہوا جب قافلہ معمول کی گشت پر تھا۔ دھماکے کی شدت اتنی زیادہ تھی کہ گاڑی مکمل طور پر تباہ ہو گئی، جس کے نتیجے میں 7 اہلکار موقع پر ہی ہلاک ہو گئے۔

واقعے کے بعد علاقے کو گھیرے میں لے کر سرچ آپریشن شروع کر دیا گیا، جبکہ شہید اہلکاروں کی لاشیں مقامی اسپتال منتقل کی گئیں۔ اس حملے کی ذمہ داری کالعدم بلوچ لبریشن آرمی نے قبول کرلی ہے۔

گوادر

بلوچستان کے ساحلی شہر گوادر میں بھی ایک دہشت گرد حملہ پیش آیا جہاں سیکیورٹی فورسز کی گاڑی کو ریموٹ کنٹرول بم سے نشانہ بنایا گیا۔ اس حملے میں دو سپاہی زخمی ہو گئے۔
دھماکہ کے بعد قانون نافذ کرنے والے اداروں نے علاقے کی ناکہ بندی کر کے مشتبہ افراد کی تلاش شروع کر دی ہے۔

پشین

ضلع پشین میں دہشت گردوں نے پولیس کو نشانہ بنایا۔ نامعلوم مسلح افراد نے سب انسپکٹر زین الدین ترین کو فائرنگ کر کے ہلاک کر دیا۔ وہ اس وقت گشت پر تھے جب انہیں نشانہ بنایا گیا۔

پولیس نے واقعے کو ٹارگٹ کلنگ قرار دیا ہے اور قاتلوں کی تلاش جاری ہے۔

خضدار

ضلع خضدار میں لیویز فورس نے ایک بڑی تباہی کا منصوبہ ناکام بنا دیا۔ روٹین گشت کے دوران مشتبہ موٹر سائیکل سے 10 کلو گرام وزنی دیسی ساختہ بم برآمد کیا گیا۔ فوری طور پر بم ڈسپوزل اسکواڈ کو طلب کر کے بم کو ناکارہ بنا دیا گیا۔
حکام کے مطابق اگر یہ بم پھٹتا تو بڑے پیمانے پر جانی نقصان ہو سکتا تھا۔