بلوچستان میں سیکیورٹی فورسز پر متعدد مسلح حملے، 6 ہلاکتوں کی اطلاعات

کوئٹہ (بیورو رپورٹ) بلوچستان کے مختلف اضلاع میں سیکیورٹی فورسز پر مسلح حملہ آوروں کی جانب سے متعدد حملے کیے گئے ہیں، جن میں ہلاکتوں کی اطلاعات موصول ہو رہی ہیں۔ شورش زدہ صوبہ بلوچستان میں پرتشدد واقعات کی لہر بدستور جاری ہے، جس میں مسلسل اضافہ دیکھا جا رہا ہے۔

تفصیلات کے مطابق، ضلع خضدار میں نامعلوم مسلح افراد نے پولیس تھانے پر چاروں اطراف سے بھرپور حملہ کر دیا، جس میں ہلکے اور بھاری ہتھیاروں کا آزادانہ استعمال کیا گیا۔ حملے کی اطلاع ملنے پر سیکیورٹی فورسز کی بھاری نفری جائے وقوعہ کی جانب روانہ ہوئی، تاہم مسلح حملہ آوروں نے گھات لگا کر سیکیورٹی اہلکاروں پر حملہ کر دیا جس کے نتیجے میں شدید جھڑپ ہوئی۔ اب تک دونوں جانب ہلاکتوں کی مصدقہ اطلاعات موصول نہیں ہو سکیں اور نہ ہی کسی مسلح تنظیم نے حملے کی ذمہ داری قبول کی ہے۔ تاہم، ان علاقوں میں بلوچ علیحدگی پسند تنظیموں کی سرگرمیاں دیکھی جا رہی ہیں۔

پنجگور میں فرنٹیئر کور کے مرکزی کیمپ پر مسلح حملہ آوروں نے جی ایل اور راکٹ لانچر کے ذریعے حملہ کیا، جس میں ہلاکتوں کی اطلاعات ہیں۔ اس حملے کی ذمہ داری بلوچ علیحدگی پسند تنظیم بلوچ لبریشن فرنٹ (بی ایل ایف) نے قبول کر لی ہے۔

قلات کے علاقے ہربوئی میں مسلح افراد نے پاک فوج کے قافلے پر گھات لگا کر حملہ کیا۔ حملے کے دوران شدید فائرنگ کا تبادلہ ہوا جس کے نتیجے میں 4 اہلکار ہلاک اور 6 شدید زخمی ہو گئے۔ حملے کی ذمہ داری بلوچ لبریشن آرمی (بی ایل اے) کے ترجمان جیئند بلوچ نے قبول کرتے ہوئے دعویٰ کیا ہے کہ ان کے جنگجوؤں کے ہاتھ حملے کے دوران بڑی مقدار میں اسلحہ اور دیگر سامان لگا ہے۔

ان واقعات سے ظاہر ہوتا ہے کہ بلوچستان میں سیکیورٹی کی صورتحال مزید پیچیدہ ہو چکی ہے، جہاں علیحدگی پسند تنظیموں کی جانب سے حملوں کا سلسلہ جاری ہے اور سیکیورٹی فورسز پر دباؤ بڑھ رہا ہے۔