بلوچستان: نوشکی میں بڑی دہشت گردی کا منصوبہ ناکام: 4 خودکش جیکٹس برآمد

کوئٹہ (نمائندہ ڈیلی اردو) صوبہ بلوچستان کے ضلع نوشکی میں حساس اداروں نے ایک بڑی دہشت گردی کی کوشش کو ناکام بناتے ہوئے ریڈ زون میں چھپائی گئی چار خودکش جیکٹس برآمد کر لی ہیں۔ یہ کارروائی خفیہ اطلاع کی بنیاد پر کی گئی، جس کے بعد علاقے میں سیکیورٹی ہائی الرٹ کر دی گئی ہے۔

ریڈ زون میں جیکٹس کی موجودگی کا انکشاف

ڈیلی اردو کے مطابق حساس اداروں کو اطلاع ملی تھی کہ ضلع نوشکی میں واقع بائی پاس روڈ، جو ڈپٹی کمشنر ہاؤس کے قریب واقع ہے، وہاں دہشت گرد عناصر نے خودکش جیکٹس چھپا رکھی ہیں۔ اطلاع ملتے ہی اداروں نے علاقے کو گھیرے میں لے کر سرچ آپریشن شروع کیا۔

جیکٹس کی پلاسٹک تھیلے میں موجودگی، کچرے کے ڈھیر میں چھپایا گیا تھا۔

حساس اداروں کو مشکوک پلاسٹک تھیلا ملا، جو کہ ریڈ زون میں واقع کچرے کے ڈھیر میں بڑی مہارت سے چھپایا گیا تھا۔ جب تھیلا کھولا گیا تو اس میں چار مکمل تیار خودکش جیکٹس موجود تھیں، جنہیں بظاہر کسی بڑی کارروائی کے لیے استعمال کیا جانا تھا۔

بم ڈسپوزل اسکواڈ کی کارروائی

خطرے کے پیش نظر بم ڈسپوزل اسکواڈ کو فوری طور پر طلب کیا گیا۔ ماہرین نے جیکٹس کو مکمل طور پر ناکارہ بنا دیا اور علاقہ کلیئر کر دیا گیا۔ جیکٹس میں استعمال شدہ دھماکہ خیز مواد کی مقدار اور ساخت سے اندازہ ہوتا ہے کہ یہ ممکنہ طور پر سیکیورٹی فورسز، سرکاری دفاتر یا کسی عوامی مقام کو نشانہ بنانے کی سازش تھی۔

علاقہ سیل، تحقیقات جاری

واقعے کے بعد بائی پاس روڈ اور اس کے اطراف کے علاقوں کو مکمل طور پر سیل کر دیا گیا ہے، جبکہ حساس ادارے اور پولیس مشترکہ طور پر تفتیش میں مصروف ہیں۔ مقامی افراد سے پوچھ گچھ جاری ہے تاکہ اس خطرناک سازش کے پیچھے موجود نیٹ ورک تک پہنچا جا سکے۔

دہشت گردوں کا ٹارگٹ کیا تھا؟

ذرائع کے مطابق، ابتدائی شواہد اس جانب اشارہ کر رہے ہیں کہ خودکش جیکٹس کا ہدف ممکنہ طور پر سرکاری دفاتر یا اعلیٰ سرکاری شخصیات تھیں۔ جیکٹس کی موجودگی ڈپٹی کمشنر ہاؤس کے قریب ہونا اس خدشے کو تقویت دیتا ہے۔