بلوچستان: نوشکی کے ڈی ایس پی محمد یوسف ریکی کی لاش برآمد

کوئٹہ (ڈیلی اردو) پاکستان کے شورش زدہ صوبے بلوچستان کے ضلع نوشکی سے اغوا ہونے والے پولیس افسر محمد یوسف ریکی کی لاش ضلع مستونگ کے علاقے کردگاپ سے برآمد ہوگئی ہے۔

محمد یوسف ریکی گذشتہ ہفتے اور اتوار کی درمیانی شب نوشکی سے کوئٹہ کی جانب سفر کے دوران گرگینہ کے مقام پر نامعلوم مسلح افراد کے ہاتھوں اغوا کیے گئے تھے۔ وہ نوشکی میں ڈی ایس پی کی حیثیت سے فرائض سرانجام دے رہے تھے۔

ڈسٹرکٹ انتظامیہ کے اہلکار خلیل احمد کے مطابق، ہلاک کیے جانے کے بعد اغوا کاروں نے ان کی لاش مستونگ کے علاقے میں ہی چھوڑ دی تھی۔ لاش کو بعد میں کوئٹہ منتقل کر کے فیاض سُنبل پولیس لائن میں نماز جنازہ ادا کی گئی۔

نماز جنازہ میں گورنر بلوچستان شیخ جعفر خان مندوخیل، صوبائی وزرا، کورکمانڈر بلوچستان لیفٹیننٹ جنرل راحت نسیم خان، انسپیکٹر جنرل پولیس محمد طاہر سمیت دیگر سویلین اور فوجی حکام نے شرکت کی۔

تاحال کسی گروہ نے ڈی ایس پی یوسف ریکی کے اغوا یا ہلاکت کی ذمہ داری قبول نہیں کی ہے۔

واضح رہے کہ گزشتہ ماہ مستونگ پولیس کے ایک اور ڈی ایس پی حمزہ رفیق کو بھی نامعلوم افراد نے اغوا کیا تھا، تاہم تین دن بعد انہیں بازیاب کر لیا گیا۔

اسی علاقے میں حال ہی میں نامعلوم مسلح افراد نے سات مزدوروں کو بھی اغوا کیا، جو ایک زیر تعمیر سرکاری عمارت پر کام کر رہے تھے۔ اغوا کے محرکات ابھی تک معلوم نہیں ہو سکے۔