بلوچستان: ژوب میں ایف سی گاڑی پر راکٹوں سے حملہ، 4 فوجی ہلاک، 5 زخمی

اسلام آباد + راولپنڈی (ڈیلی اردو نمائندگان) پاکستانی سیکورٹی فورسز نے صوبہ بلوچستان کے ضلع ژوب میں کالعدم تحریک طالبان پاکستان (ٹی ٹی پی) کے دہشت گردوں کی افغانستان سے دراندازی کی کوشش ناکام بناتے ہوئے 3 دہشت گردوں کو ہلاک کردیا جبکہ فائرنگ کے تبادلے میں پاک فوج کے 4 جوان ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق واقعہ 28 ستمبر کی شام پونے 6 بجے ضلع ژوب کے علاقہ سمبازہ میں پیش آیا۔

آئی ایس پی آر نے بتایا کہ پاک-افغان سرحد کے قریب دہشت گردوں کے ساتھ جھڑپ میں 4 جوان ہلاک ہو گئے۔

بیان میں کہا گیا کہ ہلاک ہونے والوں میں حوالدار ستار، لانس نائیک شیر اعظم، لانس نائیک عدنان اور سپاہی ندیم شامل ہیں۔

آئی ایس پی آر نے کہا کہ فائرنگ کے شدید تبادلے میں کالعدم تمظیم تحریک طالبان پاکستان 3 دہشت گردوں کو ہلاک کیا گیا ہے جبکہ متعدد زخمی بھی ہوئے ہیں۔

نمائندہ ڈیلی اردو کو سرکاری ذرائع نے بتایا کہ جمعرات اور جمعہ کی درمیانی شب بلوچستان کے ضلع ژوب میں دہشت گردوں کے ایک حملے میں فرنٹیئر کور (ایف سی) کے 4 اہکار ہلاک اور 5 دیگر شدید زخمی ہوگئے۔ دہشت گردوں نے ایف سی گاڑی کو راکٹوں سے نشانہ بنایا۔