بلوچستان: ژوب میں سرحد پار سے حملہ، 4 ایف سی اہلکار ہلاک، 6 زخمی

راولپنڈی (ڈیلی اردو) بلوچستان کے ضلع ژوب میں افغانستان سے دہشت گردوں کے حملے میں فرنٹیئر کور (ایف سی) کے 4 اہلکار ہلاک اور 6 زخمی ہوگئے۔

پاک فوج کے شعبہ تعلقات عامہ ‘آئی ایس پی آر’ سے جاری بیان کے مطابق بلوچستان کے ضلع ژوب میں پاک ۔ افغان سرحد کے ساتھ سیکٹر منکزئی میں باڑ لگانے کا کام جاری تھا، جس دوران افغانستان سے دہشت گردوں نے ایف سی کے اہلکاروں پر حملہ کیا۔ دہشت گردوں کے حملے میں 4 ایف سی اہلکار ہلاک اور 6 زخمی ہوگئے۔

ترجمان کے مطابق ہلاک ہونے والے اہلکاروں میں حوالدار نور زمان، سپاہی شکیل عباسی، سپاہی احسان اللہ اور نائیک سلطان شامل ہیں جبکہ زخمیوں کو سی ایم ایچ کوئٹہ منتقل کر دیا گیا ہے۔

ترجمان کے مطابق حملے کے دوران فرنٹیئر کور (ایف سی) کے جوان پاک افغان سرحد پر باڑ لگانے میں مصروف تھے، ایف سی نے دہشتگردوں کو منہ توڑ جواب دیا۔