بلوچستان: کوئٹہ میں ریلوے ٹریک دھماکے سے تباہ، ٹرینوں کی آمدورفت معطل

کوئٹہ (نمائندہ ڈیلی اردو) پاکستان کے شورش زدہ صوبے بلوچستان کے دارالحکومت کوئٹہ کے علاقے سریاب میں نامعلوم شرپسندوں نے ریلوے ٹریک کو دھماکے سے اڑا دیا، جس کے بعد ٹرینوں کی آمدورفت معطل کر دی گئی۔

پولیس کے مطابق دھماکے میں ریلوے لائن کو نقصان پہنچا، جس کے پیشِ نظر ٹرینوں کی آمدورفت روک دی گئی ہے جبکہ بم ڈسپوزل اسکواڈ کی ٹیم جائے وقوعہ پہنچ کر شواہد اکٹھے کر رہی ہے۔ علاقے کو سیکیورٹی فورسز نے گھیرے میں لے لیا ہے۔

اس واقعے سے قبل کوئٹہ کے قمبرانی روڈ پر یکے بعد دیگرے دو دھماکے ہوئے تھے، جن میں پولیس چوکی اور محکمہ انسدادِ دہشت گردی (سی ٹی ڈی) کی گاڑی کو نشانہ بنایا گیا۔ خوش قسمتی سے دونوں حملوں میں کوئی جانی نقصان نہیں ہوا۔

پولیس کے مطابق پہلا دھماکہ اس وقت ہوا جب نامعلوم موٹر سائیکل سوار ملزمان نے پولیس چیک پوسٹ پر دستی بم پھینکا۔ 

کچھ دیر بعد دوسرا دھماکہ ایک دیسی ساختہ بم (آئی ای ڈی) کے ذریعے اس وقت کیا گیا جب شرپسندوں نے اسی مقام کی طرف جانے والی سی ٹی ڈی کی گاڑی کو نشانہ بنانے کی کوشش کی۔