بلوچستان: کوہلو میں ایف سی چیک پوسٹ پر حملہ، 4 اہلکار ہلاک

اسلام آباد (ش ح ط) بلوچستان کے ضلع کوہلو میں شدت پسندوں کے ایک حملے میں فرنٹیئر کور کے کم از کم چار اہلکار ہلاک ہو گئے ہیں۔

تفصیلات کے مطابق ضلع کوہلو کے علاقے کاہان میں ایف سی کی خان زمان چیک پوسٹ پر نامعلوم مسلح افراد نے بدھ اور جمعرات کی درمیانی شب حملہ کیا۔

سیکیورٹی ذرائع کا کہنا تھا کہ اس واقعے میں چار اہلکار ہلاک جب کہ ایک زخمی بھی ہوا ہے۔

ذرائع کے مطابق ہلاک ہونے والے اہلکاروں میں حوالدار اکبر، سپاہی کاشف، منور خان اور سپاہی حضرت بلال شامل ہیں۔

ذرائع کا مزید کہنا تھا کہ واقعے کے فوری بعد فرنٹیئر کور (ایف سی) کی اضافی نفری اس چیک پوسٹ پر پہنچی اور زخمی ہونے والے اہلکاروں کو طبی امداد کیلئے مقامی پسپتال منتقل کیا۔

ذرائع کے مطابق حملہ آوروں کی گرفتاری کے لیے سرچ آپریشن کے علاوہ ناکہ بندی کی گئی ہے۔

دوسری جانب حملے کی ذمہ داری کالعدم عسکریت پسند تنظیم بلوچ لبریشن آرمی (بی ایل اے) نے قبول کی ہے۔