بلوچستان: کیچ میں ایف سی کی گاڑی کے قریب دھماکا، سیکیورٹی فورسز کے 5 اہلکار ہلاک، افسر سمیت 2 زخمی

اسلام آباد (ش ح ط) صوبہ بلوچستان کے ضلع کیچ کے علاقے بلیدہ میں سیکیورٹی فورسز کی گاڑی پر بارودی سرنگ کے دھماکے میں پانچ اہلکار ہلاک جبکہ افسر سمیت دو زخمی ہو گئے جبکہ فائرنگ کے تبادلے میں تین دہشت گرد بھی مارے گئے۔

بلوچستان کے ضلع کیچ کے علاقے بلیدہ میں سیکورٹی فورسز پر حملے کی اطلاعات ہیں۔ مقامی ذرائع کا کہنا ہے کہ فورسز کی گاڑی پر حملہ گذشتہ شب ہوا ہے۔ ہلاکتوں کا خدشہ ہے۔ #Buleda #Kech #Balochistan #Pakistan

— Shabbir Hussain Turi (@ShabbirTuri) January 13, 2024

سیکورٹی حکام کے مطابق بلیدہ کے علاقے گلی میں فرنٹیر کور (ایف ای) کے اہلکار معمول کے مطابق ایک گاڑی میں گشت کر رہے تھے کہ ان کی گاڑی ایک بارودی سرنگ سے ٹکرا گئی جس سے گاڑی تباہ ہوگئی اور ایف سی کے پانچ اہلکار ہلاک اور ایک افسر سمیت دو زخمی ہو گئے ہیں۔

حکام کے مطابق حملے میں ہلاک ہونے والوں کی شناخت سپاہی ٹیپو رزاق، سپاہی سنی شوکت، سپاہی شفیع اللہ، لانس نائیک طارق علی اور سپاہی محمد طارق کے ناموں سے ہوئی ہے۔ جبکہ زخمیوں میں میجر عباس اور لانس نائیک ممتاز شامل ہے۔

لاشوں اور زخمیوں کو فوری طور پر سی ایم ایچ ہسپتال منتقل کردیا گیا۔

دوسری جانب علیحدگی پسند تنظیم بلوچستان لبریشن فرنٹ (بی ایل ایف) کے ترجمان گہرام بلوچ نے حملے ذمہ داری قبول کرلی ہے۔