بنوں: اغوا ہونے والے واپڈا پیسکو کے 5 ملازمین دو ماہ بعد بازیاب

بنوں (نمائندہ ڈیلی اردو)  پاکستان کے شورش زدہ صوبے خیبر پختونخوا کے ضلع بنوں کے تھانہ کینٹ کی حدود سے دو ماہ قبل دورانِ ڈیوٹی اغوا کیے گئے واپڈا پیسکو کے پانچ ملازمین بالآخر بازیاب ہوکر اپنے گھروں کو لوٹ آئے۔

رہائی کے بعد مغوی ملازمین کو واپڈا کالونی پہنچایا گیا، جہاں ساتھی اہلکاروں اور یونین کے عہدیداروں نے ان کا پرتپاک استقبال کیا، پھولوں کے ہار پہنائے اور خوشی کا اظہار کیا۔ اس موقع پر بعض ملازمین نے شکرانے کے نوافل بھی ادا کیے۔

واضح رہے کہ نامعلوم اغوا کاروں نے پانچوں ملازمین کی رہائی کے بدلے ایک کروڑ 25 لاکھ روپے تاوان کا مطالبہ کیا تھا، جس کے باعث پیسکو ملازمین کی جانب سے چندہ مہم بھی چلائی گئی۔ تاہم رہائی کے بعد واپس آنے والے ملازمین نے میڈیا سے گفتگو سے گریز کیا۔

واپڈا ہائیڈرو یونین کے زونل چیئرمین پیر اشفاق خان نے کہا کہ یونین نے ہر فورم پر اپنے ساتھیوں کی بازیابی کے لیے آواز اٹھائی۔ ان کے مطابق تاوان کے مطالبے کے بعد ملازمین نے چندہ مہم کے ذریعے رقم جمع کی تھی، تاہم یہ رقم کسی کے حوالے نہیں کی گئی۔

انہوں نے کہا کہ مغویوں کی بحفاظت واپسی باعثِ اطمینان ہے اور توقع ظاہر کی کہ آئندہ ایسے واقعات کی روک تھام کے لیے متعلقہ ادارے مؤثر اقدامات کریں گے۔