بنوں: دہشتگردوں کا حملہ ناکام، ممند خیل میں 5 ہلاک، پولیس کیلئے کام کرنے والا شہری اغوا کے بعد ہلاک

بنوں (ڈیلی اردو رپورٹ) پاکستان کے شورش زدہ صوبے خیبر پختونخوا کے ضلع بنوں میں پولیس اور عوام نے دہشت گردوں کے حملے کو پسپا کر دیا۔ پولیس کے مطابق تھانہ ہوید کی حدود میں واقع شیخ لنڈک پولیس چوکی پر دہشت گردوں نے حملہ کیا، تاہم پولیس اہلکاروں نے بھرپور جوابی کارروائی کی جبکہ مقامی لوگ بھی ان کے شانہ بشانہ کھڑے ہو گئے، جس کے باعث دہشت گرد فرار ہونے پر مجبور ہوگئے۔

اس دوران ممند خیل کے علاقے میں گزشتہ روز پولیس کے ساتھ جھڑپ میں ہلاک ہونے والے 5 دہشت گردوں میں سے دو کی شناخت کر لی گئی ہے۔ ذرائع کے مطابق ہلاک دہشت گردوں میں ایک کی شناخت عابد عرف فتح کے نام سے ہوئی ہے جو افغانستان کا شہری تھا، جبکہ دوسرا عظمت اللہ عرف طوفان تھا جو گربز گروپ سے تعلق رکھتا تھا۔ باقی تین ہلاک دہشت گردوں کی شناخت جاری ہے۔

ادھر بنوں کے تھانہ کینٹ کی حدود سے ایک مغوی شہری کی لاش برآمد ہوئی ہے۔ ذرائع کے مطابق مقتول محب اللہ سکنہ عنایت میتا خیل منڈان کو گزشتہ روز ممند خیل میں آپریشن کے دوران دہشت گردوں نے اغوا کیا تھا۔

مقتول پولیس، سی ٹی ڈی اور سیکیورٹی اداروں کے لیے بطور "سورس" کام کرتا تھا، اسی وجہ سے اسے نشانہ بنایا گیا۔ دہشت گردوں نے اسے قتل کرنے سے قبل سوشل میڈیا پر اس کی ویڈیو بھی جاری کی تھی۔

لاش کو ضروری کارروائی کے لیے ڈسٹرکٹ ہیڈ کوارٹر ہسپتال منتقل کر دیا گیا ہے۔

سیکیورٹی ذرائع کے مطابق علاقے میں سرچ اور سٹرائیک آپریشنز بدستور جاری ہیں اور دہشت گردوں کے سہولت کاروں کے خلاف بھی کارروائی کا دائرہ وسیع کیا جا رہا ہے۔