بنوں: شدت پسندوں نے چیک پوسٹ کو بارودی مواد سے اڑا دیا، بڑی تباہی ٹل گئی

بنوں (نمائندہ ڈیلی اردو) خیبر پختونخوا کے ضلع بنوں میں نامعلوم شدت پسندوں نے ایک چیک پوسٹ کو بارودی مواد سے تباہ کر دیا جبکہ دوسری جگہ پر نصب بارودی مواد کو بروقت کارروائی کے ذریعے ناکارہ بنا دیا گیا۔

ذرائع کے مطابق واقعہ سب ڈویژن وزیر میں پیش آیا، جہاں شدت پسندوں نے تفریحی مقام برگنتو چیک پوسٹ کو بارودی مواد سے اڑا دیا۔ مذکورہ چیک پوسٹ کو سیکیورٹی خدشات کے پیش نظر پہلے ہی خالی کروایا جا چکا تھا، جس کے باعث جانی نقصان نہیں ہوا۔ اطلاعات کے مطابق اس سے قبل بھی اسی چیک پوسٹ پر شدت پسندوں نے سفید جھنڈا لہرا دیا تھا۔

دوسری جانب بنوں کے علاقے کچہ بچک میں بنوں-ڈی آئی خان روڈ کے کنارے بارودی مواد برآمد ہوا۔ پولیس کے مطابق نامعلوم افراد کی جانب سے رکھا گیا یہ بارودی مواد ممکنہ تخریبی کارروائی کے لیے نصب کیا گیا تھا، تاہم بم ڈسپوزل اسکواڈ نے فوری کارروائی کرتے ہوئے 8 کلو گرام وزنی دھماکہ خیز مواد کو ناکارہ بنا دیا، جس سے بڑی تباہی کا خطرہ ٹل گیا۔

سیکیورٹی اداروں نے دونوں واقعات کے بعد علاقے میں سرچ آپریشن شروع کر دیا ہے، جبکہ متعلقہ حکام صورتحال پر نظر رکھے ہوئے ہیں۔