بنوں میں مطلوب عسکریت پسند کمانڈر گرفتار، کئی بڑے حملوں کا اعتراف

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں کاؤنٹر ٹیررزم ڈیپارٹمنٹ (سی ٹی ڈی) نے انٹیلی جنس بیسڈ آپریشن کے دوران مطلوب عسکریت پسند تنظیم اتحاد المجاہدین پاکستان کے کمانڈر اسامہ عرف دانیال عرف باغی کو گرفتار کر لیا۔

سی ٹی ڈی کے مطابق ملزم کا تعلق ضلع بنوں سے ہے اور اس نے ایف ایس سی تک تعلیم حاصل کرنے کے بعد کالعدم تحریک طالبان پاکستان (ٹی ٹی پی) اور تحریک طالبان گارڈز (ٹی ٹی جی) کے اشتراک سے قائم تنظیم اتحاد المجاہدین پاکستان (IMP) میں شمولیت اختیار کی۔ ابتدائی تفتیش کے دوران ملزم نے مجموعی طور پر 9 بڑی دہشتگردانہ کارروائیوں میں ملوث ہونے کا اعتراف کیا۔

ایس پی سی ٹی ڈی بنوں فضل واحد خان کے مطابق، اسامہ ایک نئی عسکریت پسند تنظیم کا سرگرم کمانڈر ہے اور اس نے اسسٹنٹ کمشنر میرانشاہ پر حملے سمیت نو بڑی کارروائیوں میں ملوث ہونے کا اعتراف کیا، جبکہ دسمبر 2025 میں اے سی میرانشاہ پر حملے کا بھی اقرار کیا۔

ایس پی کے مطابق ملزم نے سابق ایس ایچ او عابد وزیر کے اغوا اور ہلاکت کے ساتھ ساتھ لکی مروت امن کمیٹی کے تین رہنماؤں کے قتل میں بھی ملوث ہونے کا انکشاف کیا۔ اسامہ ایف سی اور پولیس اہلکاروں کے اغوا میں بھی شامل رہا، جبکہ اغوا کیے گئے ایک ایف سی اہلکار تاحال بازیاب نہیں ہو سکا۔

مزید برآں، ملزم پولیو افسر ملک اسحاق اور اس کے گن مین کے قتل میں بھی ملوث تھا۔ سہولت کاروں کی گرفتاری کے لیے مختلف مقامات پر چھاپے جاری ہیں۔

اس کے خلاف انسداد دہشتگردی ایکٹ کے تحت مقدمہ درج کر کے مزید تفتیش شروع کر دی گئی ہے۔

آئی جی خیبر پختونخوا نے مطلوب عسکریت پسند کی گرفتاری پر سی ٹی ڈی ٹیم کو خراج تحسین پیش کیا۔