بھارتی خفیہ ایجنسی “را” کا لاہور میں دہشتگردی کا بڑا منصوبہ ناکام، 5 دہشت گرد گرفتار

اسلام آباد (ش ح ط) کاؤنٹر ٹیررزم ڈپارٹمنٹ (سی ٹی ڈی) لاہور نے دہشتگردی کا بڑا منصوبہ ناکام بناتے ہوئے کالعدم تنظیم کے پانچ دہشت گردوں کو گرفتار کر لیا۔

تفصیلات کے مطابق سی ٹی ڈی نے لاہور کے علاقے شاہدرہ میں کارروائی کرتے ہوئے پانچ دہشتگردوں کو گرفتار کیا ہے، سی ٹی ڈی ذرائع کا کہنا ہے کہ گرفتار دہشتگردوں کا تعلق بھارتی خفیہ ایجنسی “را” سے ہے۔

ترجمان سی ٹی ڈی کے مطابق دہشت گردوں کا منصوبہ سول سیکرٹریٹ کو نشانہ بنانا تھا، اُن کے قبضے سے دستی بم، اسلحہ، افغان کرنسی، موبائل فون، حساس مقامات کی ویڈیوز برآمد ہوئی ہیں۔

حکام کے مطابق گرفتار دہشتگردوں کی شناخت ثمر قند، عبدالرحمان، وزیر گل، عصمت اللہ اور عمران کے نام سے ہوئی ہے۔

پولیس حکام کا کہنا ہے کہ ابتدائی تفتیش کے مطابق دہشتگرد 2 ماہ قبل افغستان سے آئے تھے، افغان انٹیلی جنس ایجنسی کے انڈر کور نے انھیں جلال آباد میں ٹاسک دیا تھا۔

حکام کا کہنا ہے کہ بھارتی خفیہ ایجنسی را کا نمائندہ بھی اس ملاقات میں موجود تھا جبکہ دہشت گردوں کو فنڈز بھی را کے آفیسر نے فراہم کیے تھے۔

سی ٹی ڈی نے گرفتار دہشت گردوں کے خلاف مقدمہ درج کرلیا ہے۔