بھارتی وزارتِ دفاع کی میڈیا کو حساس کارروائیوں کی براہِ راست رپورٹنگ سے گریز کی ہدایت

دہلی (ڈیلی اردو ) بھارتی وزارتِ دفاع نے ملک بھر کے میڈیا اداروں، آن لائن پلیٹ فارمز اور عوامی صارفین سے اپیل کی ہے کہ وہ دفاعی سرگرمیوں اور سکیورٹی فورسز کی حرکات کی براہِ راست رپورٹنگ یا لمحہ بہ لمحہ کوریج سے احتراز کریں۔

وزارت نے سوشل میڈیا پلیٹ فارم ’ایکس‘ پر جاری پیغام میں کہا کہ حساس معلومات کی فوری تشہیر نہ صرف آپریشن کی کامیابی کو متاثر کر سکتی ہے بلکہ جانوں کے لیے بھی خطرہ بن سکتی ہے۔

بیان میں ماضی کے چند واقعات جیسے کارگل جنگ، 26 نومبر کے حملے اور قندھار ہائی جیکنگ کو مثال کے طور پر پیش کیا گیا ہے، جن میں قبل از وقت اطلاعات نے سنگین خدشات کو جنم دیا تھا۔

وزارت نے یہ بھی واضح کیا ہے کہ کیبل ٹی وی نیٹ ورکس ترمیمی قوانین 2021 کے مطابق صرف مقررہ حکام کو انسدادِ دہشت گردی آپریشنز سے متعلق بریفنگ دینے کا اختیار حاصل ہے۔ تمام متعلقہ فریقوں کو تلقین کی گئی ہے کہ وہ قومی مفاد میں رپورٹنگ کے دوران ذمہ داری، احتیاط اور پیشہ ورانہ اخلاقیات کو مدنظر رکھیں۔