جنوبی وزیرستان اور بنوں میں دہشت گردوں کے ہاتھوں 2 اہلکار اغوا

جنوبی وزیرستان/بنوں (نمائندگان ڈیلی اردو) خیبر پختونخوا کے قبائلی ضلع جنوبی وزیرستان اور بنوں میں دہشت گردوں نے دو الگ واقعات میں ایک پولیس کانسٹیبل اور سیکیورٹی فورسز کے اہلکار کو اغوا کر لیا۔

جنوبی وزیرستان واقعہ

ذرائع کے مطابق جنوبی وزیرستان لویر میں پولیس کانسٹیبل میثل خان کو دہشت گردوں نے توی خولہ کے علاقے سے اغوا کر لیا۔

کانسٹیبل میثل خان توی خلہ پولیس اسٹیشن کے تحت گل کچ چوکی میں ڈیوٹی سرانجام دے رہے تھے۔

دہشت گرد اہلکار کو زبردستی ساتھ لے کر نامعلوم مقام فرار ہو گئے، جس کے بعد پولیس اور سیکیورٹی فورسز نے علاقے میں سرچ آپریشن شروع کر دیا ہے۔

بنوں واقعہ

پولیس کے مطابق بنوں کے علاقے ہوید میں بھی دہشت گردوں نے سیکیورٹی فورسز کے اہلکار راشد کو اغوا کر کے نامعلوم مقام منتقل کر دیا۔

واقعے کے بعد سیکیورٹی فورسز نے علاقے کا محاصرہ کر کے دہشت گردوں کی تلاش شروع کر دی ہے۔

دونوں اضلاع میں سیکیورٹی سخت کر دی گئی ہے جبکہ اغوا کیے گئے اہلکاروں کی بازیابی کے لیے مشترکہ سرچ آپریشن جاری ہے۔