جہاں کہیں بھی ہوں، حماس رہنماؤں پر حملہ ہو سکتا ہے، اسرائیلی وزیراعظم

تل ابیب  (ڈیلی اردو/روئٹرز/ڈی پی اے/اے پی/اے ایف پی) اسرائیلی وزیر اعظم بینجمن نیتن یاہو نے کہا ہے کہ وہ حماس کے رہنماؤں پر، چاہے وہ "جہاں کہیں بھی ہوں"، مزید حملوں کے امکان کو مسترد نہیں کرتے۔ یہ بیان ایسے وقت سامنے آیا ہے جب عرب اور اسلامی ممالک کے سربراہان گزشتہ ہفتے اسرائیلی حملوں کے بعد پیدا شدہ صورت حال پر تبادلۂ خیال کے لیے قطر میں دوحہ اجلاس کر رہے ہیں۔

دوحہ میں نو ستمبر کو فلسطینی عسکریت پسند گروپ حماس کے رہنماؤں کو نشانہ بنانے کے لیے اسرائیلی فضائی حملہ کیا گیا تھا، جس کی عالمی سطح پر تقریباً سبھی ممالک نے مذمت کی۔ حماس کے مطابق اس حملے میں اس کے پانچ ارکان ہلاک ہوئے، تاہم اعلیٰ قیادت محفوظ رہی۔ حملے میں قطر کی داخلی سکیورٹی فورسز کا ایک رکن بھی ہلاک ہوا۔

دوحہ سمٹ سے خطاب کرتے ہوئے قطر کے امیر شیخ تمیم بن حمد الثانی نے اسرائیلی حملے کو "بزدلانہ اور غدارانہ" قرار دیا۔ انہوں نے کہا کہ حملے کے وقت  حماس کے رہنما امریکی ثالثی کی جنگ بندی تجویز پر غور کر رہے تھے، جو قطر اور مصر نے پیش کی تھی۔

قطر میں اسرائیلی حملے کے بعد خلیجی عرب ریاستوں کے درمیان تعلقات میں پیچیدگی پیدا ہوئی اور متحدہ عرب امارات و اسرائیل کے تعلقات میں بھی تناؤ بڑھ گیا، جو 2020 میں قائم ہوئے تھے۔

یروشلم میں امریکی وزیر خارجہ مارکو روبیو سے ملاقات میں نیتن یاہو نے کہا کہ اسرائیل حملے کے نتائج سے متعلق حتمی رپورٹ حاصل کر رہا ہے۔ امریکی محکمہ خارجہ کے ایک سینئر عہدیدار کے مطابق روبیو اسرائیل کے دورے کے بعد قطر بھی جائیں گے۔

روبیو نے قطر پر زور دیا کہ وہ غزہ کے تنازعے کے حل میں اپنا تعمیری کردار جاری رکھے۔ انہوں نے کہا کہ قطر غزہ میں قید 48 اسرائیلی یرغمالیوں کی رہائی، حماس کو غیر مسلح کرنے اور غزہ کے لیے بہتر مستقبل کی تعمیر میں اہم کردار ادا کر سکتا ہے۔

امریکی صدر ڈونلڈ ٹرمپ نے بھی قطر میں اسرائیلی حملے پر اپنی ناپسندیدگی ظاہر کی اور اتوار کو کہا کہ اسرائیل کو محتاط رہنا چاہیے۔