حزب اللہ کی خفیہ بحری فورسز کے منصوبہ ساز عماد امھز کو گرفتار کر لیا، اسرائیلی فوج

تل ابیب (ڈیلی اردو) اسرائیلی فوج نے دعویٰ کیا ہے کہ لبنان میں گزشتہ سال گرفتار ہونے والا عماد امھز حزب اللہ کا وہ کارکن تھا جس نے اس عسکریت پسند گروپ کے لیے خفیہ میری ٹائم فورس کی منصوبہ بندی میں مرکزی کردار ادا کیا۔

فوج کے مطابق نومبر 2024 میں شمالی لبنان کے شہر البترون سے گرفتار کیے جانے کے بعد امھز کو اسرائیل منتقل کیا گیا، جہاں تفتیش کے دوران انہوں نے خفیہ بحری فورسز کی منصوبہ بندی میں حصہ لینے کا اعتراف کیا۔ اسرائیلی فوج نے اسے حزب اللہ کے انتہائی حساس اور خفیہ منصوبوں میں سے ایک قرار دیا اور چین آف کمانڈ کو ختم کر کے اس کی پیشرفت میں خلل ڈالا۔

ابتدائی تحقیقات کے مطابق اسرائیلی کمانڈوز نے امھز کو اغوا کرنے کے لیے ریڈار جیمنگ ڈیوائسز سے لیس اسپیڈ بوٹ استعمال کیا۔ لبنان کے ایک عدالتی اہلکار نے اسے "قومی خودمختاری کی خلاف ورزی کرنے والا جنگی جرم" قرار دیا کیونکہ اس کارروائی میں لڑائی سے دور ایک علاقے میں شہری کا اغوا بھی شامل تھا۔

عماد امھز، البترون میں میرائ ٹائم سائنسز اینڈ ٹیکنالوجی انسٹی ٹیوٹ (MARSATI) میں بحری تربیت حاصل کر رہے تھے اور 2004 میں حزب اللہ میں شامل ہوئے تھے، جبکہ انہیں 2007 میں ایران میں تربیت دی گئی۔ 

حزب اللہ نے ابھی تک امھز کے اپنے گروپ کا رکن ہونے کا دعویٰ نہیں کیا۔