حماس نے غلط انسانی باقیات حوالے کیں، اسرائیل کا الزام

یروشلم (ڈیلی اردو/اے ایف پی/ڈی پی اے/روئٹرز) اسرائیلی وزیرِاعظم بینجمن نیتن یاہو نے اعلان کیا ہے کہ اسرائیل حماس کی جانب سے غلط انسانی باقیات حوالے کرنے کے بعد جوابی کارروائی کرے گا۔ 

اسرائیلی وزیراعظم نے کہا کہ حوالے کی گئی باقیات ان اسرائیلی یرغمالیوں میں سے نہیں تھیں، جن کی باقیات فائربندی معاہدے کے تحت اسرائیل کے سپرد کی جانا تھیں۔ نیتن یاہو نے اس اقدام کو غزہ میں جنگ بندی معاہدے کی خلاف ورزی قرار دیا ہے۔ 

فلسطینی عسکری تنظیم حماس کا کہنا ہے کہ وہ جنگ بندی پر عمل کر رہی ہے اور یرغمالیوں کی لاشوں کو تلاش کرنے کی پوری کوشش کر رہی ہے، لیکن غزہ میں شدید تباہی اور شناخت کے آلات کی کمی ان کوششوں میں مشکلات پیدا کر رہی ہے۔ 

نیتن یاہو کے مطابق حماس نے جو جسمانی باقیات اسرائیل کے حوالے کی گئیں، وہ اس اسرائیلی یرغمالی کی تھیں، جس کی لاش کو اسرائیلی فوج نے غزہ جنگ کے ابتدائی حصے ہی میں بازیاب کر لیا تھا۔ نیتن یاہو نے کہا کہ جنگ بندی معاہدے کے تحت حماس کو ان اسرائیلی یرغمالیوں کی باقیات فراہم کرنا ہیں، جو حماس کے قبضے میں ہلاک ہوئے۔ 

دوسری جانب اسرائیل میں یہ مطالبات زور پکڑ رہے ہیں کہ فائربندی کی خلاف ورزی پر حماس کے خلاف سخت کارروائی کی جانا چاہیے۔ 

واضح رہے کہ جنگ بندی معاہدے کے تحت حماس نے تمام زندہ

 اسرائیلی یرغمالیوں کو رہا کیا جبکہ اسرائیل نے تقریباً 2,000 فلسطینی قیدیوں کو آزاد کیا اور غزہ میں اپنی فوجی کارروائی روک دی۔ 

غزہ میں گزشتہ دنوں سے بھاری مشینری، خصوصاً مصر سے آنے والے بلڈوزرز کی مدد سے، لاشوں کی تلاش تیز کر دی گئی ہے۔ کہا جا رہا ہے کہ بعض لاشیں حماس کی زیرِ زمین سرنگوں میں ہونے کا شبہ ہے، تاہم کئی مقامات پر سرنگیں شدید تباہی کا شکار ہوئی ہیں۔