حمزہ بن حسین: اردن شہزادے نے پالیسیوں کیخلاف بطور احتجاج اپنا شاہی خطاب ترک کردیا

حمزہ بن حسین: اردن شہزادے نے پالیسیوں کیخلاف بطور احتجاج اپنا شاہی خطاب ترک کردیا

عمان (ڈیلی اردو/اے پی/اے ایف پی/ڈی پی/روئٹرز) اردن کے شہزادہ حمزہ بن حسین نے اعلان کیا ہے کہ اب وہ اپنا شاہی لقب ‘شہزادہ’ نہیں چاہتے ہیں۔ اس سے قبل ان پر یہ الزام عائد کیا گیا تھا کہ انہوں نے ‘مملکت کی سلامتی کو غیر مستحکم کرنے’ کی سازش کی تھی۔

اردن کے شاہ عبداللہ دوئم کے سوتیلے بھائی شہزادہ حمزہ بن حسین نے اتوار کے روز کہا کہ وہ اپنے شاہی خطاب ”شہزادہ” سے دستبردار ہو رہے ہیں۔

انہوں نے اس کا اعلان کرتے ہوئے ٹویٹر پر لکھا، ”گزشتہ برسوں میں جو کچھ بھی میں نے دیکھا اس کے بعد، میں اس نتیجے پر پہنچا ہوں کہ میرے ذاتی نظریات اور وہ اقدار جو میرے والد نے مجھ میں پروان چڑھائی تھیں… وہ ہمارے اداروں کے نقطہ نظر، رجحانات یا جدید طریقوں سے مطابقت نہیں رکھتی ہیں۔”

pic.twitter.com/HSuet5cpht

— Hamzah bin AlHussein (@HamzahHKJ) April 3, 2022

گزشتہ برس اپریل میں ملک کے موجودہ فرماں روا شاہ عبداللہ نے حمزہ پر مملکت کو غیر مستحکم کرنے کی مبینہ سازش کا الزام عائد کرتے ہوئے انہیں کچھ مدت کے لیے نظر بند کر دیا تھا۔

گزشتہ مہینے ہی اردن نے ایک معافی نامہ شائع کیا تھا جس پر حمزہ نے دستخط کیے تھے اور اس میں انہوں نے اپنی غلطی کا اعتراف بھی کیا تھا۔

اردن کے شاہی خاندان کا جھگڑا؟
سن 1999 میں جب اردن کے شاہ حسین انتقال کر گئے اور ان کے بڑے بیٹے عبداللہ کو بادشاہت ملی تو اسی وقت ان کے سوتیلے بھائی حمزہ بن حسین کو ولی عہد نامزد کیا گیا تھا۔ سن 2004 تک وہ اپنے سوتیلے بھائی کے وارث بھی تھے۔ تاہم بعد میں شاہ عبداللہ نے ان سے ولی عہد کا یہ لقب چھین لیا اور سن 2009 میں اپنے بیٹے کو ولی عہد کے عہدے پر فائز کر دیا۔

اردن کے شاہ عبداللہ نے اپنے بھائی پر بغاوت کا بھی الزام لگایا تھا، تاہم کہا کہ یہ تنازعہ خاندان کے اندر ہی حل کیا جا رہا ہے اور حمزہ بادشاہ کے تحفظ میں اپنے ہی محل میں مقیم ہیں۔