حیدر آباد میں سی ٹی ڈی کی کارروائی، کالعدم بلوچ لبریشن آرمی کے دو دہشت گرد گرفتار

کراچی (نمائندہ ڈیلی اردو) کاؤنٹر ٹیررازم ڈیپارٹمنٹ ( سی ٹی ڈی) نے صوبہ سندھ کے ضلع حیدرآباد میں ایک آپریشن کے دوران روپوش 2 دہشت گردوں کو گرفتار کر لیا ہے۔

سی ٹی ڈی کے مطابق حیدرآباد کے علاقے قاسم آ باد میں کارروائی کرتے ہوئے کالعدم بلوچ لبریشن آرمی کے 2 انتہائی مطلوب روپوش دہشت گرد عبدالرحیم اور غلام شبیر کو گرفتار کیا گیا۔

گرفتار ملزمان کی نشاندہی پر سی ٹی ڈی اور بم ڈسپوزل اسکواڈ کی ٹیم نے گلستانِ سرمست سے زمین میں چھپائی گئی لوہے کی پیٹی میں سے 3 ہینڈ گرنیڈ، ایک کلو بارودی مواد، نٹ بولٹ، بال بیئرنگ، ڈیٹونیٹر، ریموٹ کنٹرول، سیل، تار، اسلحہ، ہزاروں روپے نقدی اور رسید بک برآمد کر لی۔

کاؤنٹر ٹیررازم ڈیپارٹمنٹ کے مطابق ملزمان رواں برس اپریل میں لونی کوٹ اور جامشورو میں سی ٹی ڈی اہلکاروں پر حملوں میں بھی ملوث ہیں۔

سی ٹی ڈی نے مزید بتایا کہ گرفتار دہشت گردوں کے قبضے سے اسلحہ، ٹیرر فنانسنگ فنڈکی خطیر رقم برآمد ہوئی، ملزمان سے فتنۃ الہندوستان سے وابستگی کے اہم ثبوت اور رسالے بھی ملے۔