خیبر پختونخوا: اورکزئی سے تحریک طالبان پاکستان کا اہم کمانڈر گرفتار

اسلام آباد (ش ح ط) سیکیورٹی فورسز نے مختلف مقدمات میں مطلوب کالعدم تحریک طالبان پاکستان کے مبینہ کمانڈر کو گرفتار کرکے اس کے قبضے سے بھاری تعداد میں اسلحہ برآمد کرنے کا دعویٰ کرلیا ہے۔

سیکیورٹی ذرائع کے مطابق سیکیورٹی حکام نے بتایا کہ صوبہ خیبر پختونخوا کے قبائلی ضلع اورکزئی کے علاقے کلایہ میں سیکورٹی اداروں نے کارروائی کرتے ہوئے کالعدم تنظیم تحریک طالبان پاکستان (ٹی ٹی پی) کے اہم کمانڈر حاجی رحمان عرف ابو ذاکر گرفتار کر لیا ہے۔

سیکورٹی حکام کے مطابق کمانڈر حاجی رحمان ولد عبد الرحمان سکنہ لاکہ شکر تنگے قوم شیخان کو کلایہ اورکزئی کے مقام پر ان کے گھر پر چھاپے کے دوران گرفتار کر لیا گیا ہے۔

گرفتار کمانڈر حاجی رحمان سے اسلحہ و راکٹ لانچر بھی برآمد کر لئے گئے۔

سیکورٹی کے مطابق اسلحہ و ایمونیشنز میں ایک عدد راکٹ لانچر، 6 عدد راکٹ گولے، 6 عدد مارٹر گولے، ایک عدد رائفل، ایک عدد پستول اور مختلف بور کے کارتوس برآمد شامل ہیں۔