خیبر پختونخوا میں دہشت گردی کے مختلف واقعات، امام مسجد سمیت 8 افراد ہلاک

واشنگٹن (ش ح ط) پاکستان کے شورش زدہ صوبہ خیبر پختونخوا کے مختلف اضلاع میں دہشت گردانہ کارروائیوں اور دھماکوں کی ایک لہر سامنے آئی ہے۔ پولیس اور قانون نافذ کرنے والے ادارے تمام واقعات کی تحقیقات کر رہے ہیں۔

اورکزئی میں امام مسجد ذبح

قبائلی ضلع اورکزئی کے علاقے غلجو کے حدود ڈی ڈی ایم دڑا دڑ (ماما زئی) میں جامع مسجد کے امام اجمل کو تین روز قبل عسکریت پسندوں نے اغوا کیا تھا۔ آج مغوی کی لاش اسی علاقے سے برآمد ہوئی۔ ابتدائی اطلاعات کے مطابق مقتول کو ذبح کیا گیا تھا۔

پولیس کے مطابق واقعے میں داعش خراسان کے عناصر ملوث ہونے کا شبہ ہے، تاہم حتمی رائے تفتیش کے بعد دی جائے گی۔

خیبر میں دھماکا

قبائلی ضلع خیبر کی تحصیل لنڈی کوتل میں ذکریاں مسجد کے قریب دھماکہ ہوا۔ دھماکہ بے نظیر انکم سپورٹ پروگرام کے دفتر کے سامنے پیش آیا، جس سے دیوار کو جزوی نقصان پہنچا، لیکن کسی قسم کا جانی نقصان نہیں ہوا۔ 

پولیس نے جائے وقوعہ پر پہنچ کر تحقیقات شروع کی اور علاقے میں سیکیورٹی سخت کر دی۔

ڈیرہ اسماعیل خان میں پولیس پر حملہ

اسماعیل خان میں شدت پسندوں کے حملے میں ایس ایچ او فہیم ممتاز سمیت چار پولیس اہلکار ہلاک جبکہ ڈی ایس پی پہاڑ پور سرکل عدنان سمیت دو اہلکار زخمی ہو گئے۔

پشاور میں دھماکہ

خیبر پختونخوا کے دارالحکومت پشاور میں ایک بارودی مواد کا دھماکہ ہوا، جو ریٹائر ڈی آئی جی فصیح الدین کے کرایہ کے کوارٹر کے باہر پیش آیا۔ 

پولیس نے فوری طور پر علاقے میں سرچ آپریشن شروع کر دیا۔ دھماکے میں کوئی جانی نقصان نہیں ہوا اور ملزمان کی تلاش جاری ہے۔

لکی مروت: ڈرون حملہ، 8 زخمی

ضلع لکی مروت میں ’امن کمیٹی‘ کے سربراہ کے گھر پر کواڈ کاپٹر ڈرون حملہ ہوا، جس میں تین بچوں سمیت 8 افراد زخمی ہو گئے۔ زخمیوں کو سرائے نورنگ کے ہسپتال منتقل کیا گیا۔

باجوڑ: ن لیگی رہنما کے گھر بم دھماکہ

قبائلی ضلع باجوڑ میں مسلم لیگ ن کے رہنما نوابزادہ وحید خان کے گھر پر بم دھماکہ ہوا۔ رات گئے پیش آنے والے دھماکے میں گیٹ مکمل طور پر تباہ ہوا تاہم کوئی جانی نقصان نہیں ہوا۔ پولیس نے جائے وقوعہ پر پہنچ کر تحقیقات کا آغاز کیا۔ دھماکے کے وقت رہنما پشاور میں موجود تھے۔

بنوں: پولیس وین پر عسکریت پسندوں کا حملہ ناکام

ضلع بنوں کے علاقے گل بہار چوک میں عسکریت پسندوں نے پولیس وین پر حملہ کیا۔ پولیس اور حملہ آوروں کے درمیان شدید فائرنگ کا تبادلہ ہوا۔ پولیس کی مؤثر کارروائی کے نتیجے میں عسکریت پسند فرار ہونے پر مجبور ہو گئے، جبکہ متعدد زخمی ہونے کی اطلاعات ہیں۔ 

پولیس نے علاقے کو گھیرے میں لے کر سرچ آپریشن شروع کر دیا۔

دریں اثنا بنوں میں پولیس اور دہشت گردوں کے درمیان ہونے والے فائرنگ کے تبادلے میں 3 عسکریت پسند ہلاک ہو گئے۔