خیبر پختونخوا میں سیکیورٹی آپریشنز اور دہشتگرد حملے، 6 ملازمین و اہلکار اغوا

پشاور (ڈیلی اردو رپورٹ) خیبرپختونخوا اور قبائلی اضلاع میں سیکیورٹی فورسز اور دہشتگردوں کے درمیان مختلف جھڑپوں اور کارروائیوں میں مجموعی طور پر 15 دہشتگرد ہلاک، جبکہ کئی دیگر زخمی ہو گئے ہیں۔ متعدد مقامات پر فورسز اہلکاروں کو بھی نقصان پہنچا ہے۔

جنوبی وزیرستان: 9 دہشت گرد ہلاک، آپریشن جاری

ضلع جنوبی وزیرستان کے علاقوں شین وارسک اور کالاتوئی میں سیکیورٹی فورسز نے کالعدم تحریک طالبان پاکستان (ٹی ٹی پی) سے وابستہ مسلح افراد کے خلاف آپریشن کیا۔ جھڑپ میں 5 دہشتگرد مارے گئے جبکہ 3 زخمی ہوئے۔ ایک سپاہی زخمی ہوا۔

مذکورہ افراد ایک گھر میں محصور تھے اور آپریشن میں گن شپ ہیلی کاپٹر بھی استعمال کیے گئے۔ اطلاعات ہیں کہ کچھ زخمی دہشتگرد قریبی عمارتوں میں چھپ گئے ہیں جن کی تلاش جاری ہے۔

جنوبی وزیرستان ہی کی تحصیل برمل کے علاقے کلوتائی میں ایک اور خفیہ آپریشن کے دوران سیکیورٹی فورسز نے 4 دہشتگردوں کو ہلاک کر دیا۔ اس کارروائی میں دونوں جانب سے بھاری ہتھیاروں کا استعمال کیا گیا جبکہ 2 اہلکار معمولی زخمی ہوئے۔

شمالی وزیرستان: 3 دہشتگرد ہلاک، بینک پر بم حملہ

شمالی وزیرستان میں سیکیورٹی فورسز کی کارروائی میں 3 دہشتگرد مارے گئے۔

دوسری جانب میر علی میں دہشتگردوں نے یو بی ایل بینک پر دھماکہ خیز مواد سے حملہ کیا، جس سے عمارت کو جزوی نقصان پہنچا تاہم کوئی جانی نقصان نہیں ہوا۔ پولیس نے علاقے کو گھیرے میں لے کر تحقیقات شروع کر دی ہیں۔

ڈیرہ اسماعیل خان سے دو اہلکار اغوا

ضلع ڈیرہ اسماعیل خان کی تحصیل کلاچی میں دو سیکیورٹی اہلکاروں کو اغوا کر کے نامعلوم مقام پر منتقل کر دیا گیا۔

سیکیورٹی ذرائع کے مطابق مغوی اہلکار چھٹی پر گھر آئے ہوئے تھے۔

درابن کوٹ لعلو کے علاقے میں سرچ آپریشن کے دوران دہشتگردوں نے پولیس اور سی ٹی ڈی اہلکاروں پر فائرنگ کر دی۔ جوابی کارروائی کے بعد دہشتگرد جنگل کی طرف فرار ہو گئے۔ علاقے میں سرچ آپریشن جاری ہے۔

ٹانک: سرکاری ملازمین اغوا اور فورسز پر حملے

ضلع ٹانک کے علاقوں پائی اور اماخیل کے درمیان دہشتگردوں نے چار سرکاری ملازمین کو اغوا کر کے نامعلوم مقام پر منتقل کر دیا۔

دوسری جانب شادی خیل پوسٹ پر دہشتگردوں نے حملہ کیا جس کے بعد دونوں جانب سے فائرنگ کا تبادلہ ہوا۔ آپریشن جاری ہے۔

پشاور اور درہ آدم خیل میں حملے ناکام

پشاور کے نواحی علاقے ارمڑ میں دہشتگردوں نے پولیس چوکی پر حملے کی کوشش کی، تاہم اہلکاروں کی بروقت کارروائی سے حملہ ناکام بنا دیا گیا۔ حملے میں چوکی کو معمولی نقصان پہنچا۔

ادھر درہ آدم خیل کی زنگی پوسٹ پر بھی دہشتگردوں نے چھوٹے اور بڑے ہتھیاروں سے حملہ کیا، تاہم جوابی کارروائی پر حملہ آور فرار ہو گئے۔