خیبر پختونخوا: پاک فوج نے 82 مربع کلومیٹر علاقہ بارودی مواد سے کلیئر کردیا

پشاور (نمائندہ ڈیلی اردو) پاکستان کے شورش زدہ صوبے خیبر پختونخوا میں سیکیورٹی فورسز نے بڑے پیمانے پر ڈی مائننگ آپریشن کے دوران 82 مربع کلومیٹر علاقے کو بارودی سرنگوں اور دھماکا خیز مواد سے پاک کر دیا ہے۔

فوجی حکام کے مطابق حالیہ کارروائیوں میں انکشاف ہوا ہے کہ دہشتگردوں نے 114 مربع کلومیٹر رقبے پر بارودی سرنگوں اور بموں کا ایک منظم اور خطرناک نیٹ ورک بچھا رکھا تھا، جس کا مقصد نہ صرف دہشتگردی پھیلانا تھا بلکہ سیکیورٹی فورسز کی پیش قدمی کو بھی روکنا تھا۔

ترجمان کے مطابق فورسز نے علاقے میں فوری طور پر ڈی مائننگ آپریشن کا آغاز کیا، جس کے دوران 82 مربع کلومیٹر علاقہ مکمل طور پر کلیئر کر دیا گیا، تاکہ عام شہریوں اور سفر کرنے والے افراد کی زندگیوں کو محفوظ بنایا جا سکے۔

ڈی مائننگ کا عمل انتہائی حساس اور خطرناک ثابت ہوا۔ ترجمان کے مطابق کارروائی کے دوران پاک فوج کے 5 اہلکار ہلاک ہو گئے جبکہ 115 اہلکار دھماکوں کے نتیجے میں ہاتھ یا پاؤں سے محروم ہو چکے ہیں۔

سیکیورٹی فورسز کا کہنا ہے کہ بارودی مواد کی صفائی نہ صرف دہشتگردی کی سازشوں کو ناکام بنانے کے لیے ضروری ہے بلکہ مقامی آبادی کی جان و مال کے تحفظ کے لیے بھی ناگزیر ہے۔ حکام نے اس عزم کا اظہار کیا ہے کہ باقی علاقوں کو بھی جلد کلیئر کر کے مکمل امن و استحکام یقینی بنایا جائے گا۔