خیبرپختونخوا اور بلوچستان میں فائرنگ، دھماکہ اور جھڑپیں:سی ٹی ڈی افسر ہلاک، شدت پسند کمانڈر مارا گیا، پولیس اہلکار زخمی

اسلام آباد (ڈیلی اردو رپورٹ) خیبرپختونخوا اور بلوچستان میں فائرنگ، بم دھماکے اور سیکیورٹی فورسز کی کارروائیوں کے نتیجے میں ایک سی ٹی ڈی افسر اور ایک شہری ہلاک، جبکہ ایک پولیس اہلکار زخمی ہوگیا ہے۔ وادی تیراہ میں ایک جھڑپ کے دوران کالعدم تنظیم لشکرِ اسلام سے تعلق رکھنے والا اہم شدت پسند کمانڈر بھی مارا گیا۔

پشاور میں سی ٹی ڈی افسر ہلاک

پشاور کے قبائلی سب ڈویژن حسن خیل (ایف آر پشاور) میں موٹرسائیکل پر سوار نامعلوم حملہ آوروں نے فائرنگ کر کے کاؤنٹر ٹیررازم ڈیپارٹمنٹ (سی ٹی ڈی) کے انچارج سہیل الرحمان کو ہلاک کر دیا۔ پولیس کے مطابق واقعہ اُس وقت پیش آیا جب سہیل الرحمان دورانِ ڈیوٹی تھے۔

ٹانک دھماکے میں شہری ہلاک

ضلع ٹانک کے علاقے آپاخیل بیٹنی مضافات میں ایک موٹر سائیکل میں نصب بم دھماکے سے مقامی شخص کمال خان ہلاک ہو گیا۔ حکام کا کہنا ہے کہ دھماکہ خیز مواد موٹر سائیکل میں نصب تھا اور واقعے کی تحقیقات جاری ہیں۔

خیبر میں شدت پسند کمانڈر ہلاک

خیبر ضلع کی وادی تیراہ میں سیکیورٹی فورسز اور کالعدم تنظیم لشکرِ اسلام کے شدت پسندوں کے درمیان جھڑپ کے نتیجے میں ایک اہم کمانڈر حکیم اللہ مارا گیا۔ ذرائع کے مطابق حکیم اللہ کا تعلق ضلع مہمند سے تھا اور وہ متعدد دہشتگرد کارروائیوں میں ملوث رہا ہے۔ تنظیم سے وابستہ ذرائع نے بھی اس کی ہلاکت کی تصدیق کر دی ہے۔

خاران: پولیس اہلکار زخمی

بلوچستان کے ضلع خاران میں ڈی آئی جی پولیس کمپلیکس پر دہشتگردوں کی فائرنگ سے پولیس اہلکار عبدالقیوم شدید زخمی ہو گیا۔ پولیس ذرائع کے مطابق زخمی اہلکار کو فوری طبی امداد کے لیے اسپتال منتقل کر دیا گیا ہے۔ حملہ آوروں کی تلاش کے لیے علاقے میں سرچ آپریشن جاری ہے۔