خیبرپختونخوا پولیس نے 83 مطلوب دہشت گردوں کے سروں کی قیمت مقرر کر دی

پشاور (نمائندہ ڈیلی اردو) خیبرپختونخوا پولیس نے دہشت گردی کے خلاف کارروائیوں کو مزید مؤثر بنانے کے لیے 83 مطلوب دہشت گردوں کے سروں کی قیمت مقرر کر دی ہے۔ پولیس کے مطابق ان مطلوب افراد کی گرفتاری یا ان سے متعلق مؤثر معلومات فراہم کرنے والوں کے لیے مجموعی طور پر 28 کروڑ 58 لاکھ روپے کی انعامی رقم مختص کی گئی ہے۔

سینٹرل پولیس آفس (سی پی او) کی جانب سے جاری فہرست کے مطابق مطلوب دہشت گردوں کی اطلاع، گرفتاری یا ان کی گرفتاری میں مددگار ثابت ہونے والی قابلِ اعتماد معلومات فراہم کرنے والے افراد کو مالی انعام دیا جائے گا۔

پولیس کا کہنا ہے کہ اطلاع دینے والے شہری کی شناخت مکمل طور پر خفیہ رکھی جائے گی تاکہ معلومات فراہم کرنے والوں کی حفاظت اور رازداری کو یقینی بنایا جا سکے۔

جاری کردہ فہرست کے مطابق مطلوب دہشت گردوں کے سروں کی قیمت 5 لاکھ روپے سے ایک کروڑ روپے تک مقرر کی گئی ہے۔ انعامی فہرست میں ضلع ڈیرہ اسماعیل خان، کلاچی، درازندہ، درابن، پروآ اور دیگر علاقوں میں سرگرم مطلوب افراد شامل ہیں۔

خیبرپختونخوا پولیس نے شہریوں سے اپیل کی ہے کہ وہ دہشت گردوں اور فتنۂ خوارج سے وابستہ مشتبہ سرگرمیوں پر کڑی نظر رکھیں اور کسی بھی مشکوک سرگرمی یا مطلوب شخص سے متعلق اطلاع فوری طور پر قریبی پولیس تھانے یا متعلقہ اداروں کو دیں۔

پولیس حکام کے مطابق عوامی تعاون دہشت گردی کے خلاف کارروائیوں میں انتہائی اہم کردار ادا کرتا ہے، اور شہریوں کی بروقت اطلاعات کی مدد سے دہشت گردوں کے نیٹ ورک کو مؤثر انداز میں نشانہ بنایا جا سکتا ہے۔

حکام کا کہنا ہے کہ صوبے میں امن و امان کے قیام اور دہشت گردی کے خاتمے کے لیے انٹیلی جنس پر مبنی کارروائیاں اور عوامی تعاون دونوں کو یکساں اہمیت دی جا رہی ہے۔

پاکستان، کالعدم تحریک طالبان پاکستان (ٹی ٹی پی) سے تعلق رکھنے والے دہشت گردوں کیلئے خوارج کی اصطلاح استعمال کرتا ہے۔