راولپنڈی میں پولیس اہلکاروں کی کار پر فائرنگ، سابق کونسلر وحید انجم جاں بحق

راولپنڈی (ڈیلی اردو) صوبہ پنجاب کے شہر راولپنڈی کے علاقے کلر سیداں میں پولیس کی فائرنگ سے کار میں سوار سابق کونسلر وحید انجم جاں بحق ہوگئے۔

تفصیلات کے مطابق راولپنڈی کے علاقے کلرسیداں میں ناکے پر پولیس کی فائرنگ سے کار میں سوار وحید انجم نامی شخص جان کی بازی ہار گیا۔

پولیس حکام کے مطابق بنک چوک کنوہا میں مشکوک کار کو رکنے کا اشارہ کیا گیا، ڈرائیور نے رکنے کی بجائے رفتار بڑھا کر اہلکار کو ٹکر ماری اور گھسیٹا، ناکے پر موجود اہلکاروں کی فائرنگ سے کار ڈرائیور جاں بحق ہوا۔

پولیس نے فائرنگ سے جاں بحق سابق کونسلر کے خلاف ہی مقدمہ درج کرلیا۔ ایس پی صدر مظہر اقبال کا کہنا ہے کہ واقعے کی تحقیقات شروع کردی گئی ہیں۔

علاقہ مکینوں نے تھانہ کلر سیداں کا گھیراؤ کرلیا، مظاہرین کا موقف ہے کہ کار پر فائرنگ کے نشان تک نہیں ہیں، پولیس نے کار سے نکال کر قتل کیا۔

پولیس نے واقعہ کو سیلف ڈیفنس قرار دینے کی کوشش کی تاہم اطلاع ملتے ہی ورثاء، اہل علاقہ اور تحریک انصاف کے رکن صوبائی اسمبلی راجہ صغیر احمد پولیس اسٹیشن کے باہر جمع ہوگئے اور شدید احتجاج کیا۔

تھانہ کلر سیداں کے 5 اہلکاروں کے خلاف مقدمہ درج کر کے 2 اہلکاروں کو گرفتار کرلیا گیا۔

اہل علاقہ کے احتجاج کے باعث سی پی او راولپنڈی نے واقعہ کا فوری نوٹس لیا اور مقدمہ کے نامزد 2 اے ایس آئیز اور 3 کانسٹیبلز کو معطل کردیا۔ جبکہ اے ایس آئی عمران خالد اور کانسٹیبل حبیب اختر کو گرفتار کرلیا گیا۔ پولیس نے اپنے اہلکاروں کیخلاف بھی ایک مقدمہ درج کرلیا ہے۔

سی پی او راولپنڈی فیصل رانا کا کہنا ہے کہ قانون شکنی کرنے والے اہلکار جیلوں میں ہوں گے۔