سعودی عرب دھماکا: داعش نے ذمہ داری قبول کرلی

ریاض (ڈیلی اردو) سعودی عرب کے شہر جدہ میں جنگ عظیم اول کی یادگاری تقریب میں ہونے والے دھماکے کی کی ذمہ داری عالمی دہشت گرد تنظیم داعش نے قبول کرلی ہے۔

فرانسیسی خبر رساں ایجنسی اے ایف پی کے مطابق داعش نے اپنے بیان میں حملے کی ذمہ داری قبول کی ہے اور کہا ہے کہ اس کا نشانہ فرانسیسی قونصلر تھے۔

داعش کا کہنا ہے کہ اس نے یہ حملہ فرانس کی جانب سے گستاخانہ خاکوں کے ردعمل میں کیا۔

خیال رہے کہ گزشتہ روز سعودی عرب کے شہر جدہ میں غیرمسلموں کے قبرستان میں ہونے والے بم دھماکے میں متعدد افراد زخمی ہوگئے تھے۔

بم دھماکے کے وقت قبرستان میں جنگ عظیم اول کے اختتام کی یاد میں تقریب جاری تھی جس میں فرانسیسی قونصل خانے کے اہلکار سمیت متعدد یورپی ممالک کے قونصلر اور سفارتی اہلکار موجود تھے۔

فرانسیسی وزارت خارجہ نے واقعے کی تصدیق کرتے ہوئے کہا ہے کہ بم دھماکے میں متعدد افراد زخمی ہوئے ہیں اور یہ ایک نصب شدہ بم تھا۔