سعودی عرب کا حوثی باغیوں کا ڈرون حملہ ناکام بنانے کا دعویٰ

صنعاء (ڈیلی اردو) یمن کے حوثی گروہ نے سعودی عرب کے جنوب مغرب میں واقع شاہ خالد ایئربیس کو بارود سے بھرے ڈرون سے نشانہ بنانے کے تازہ ترین واقعے کی ذمہ داری قبول کر لی ہے۔

حوثیوں کے زیر انتظام چلنے والے المسیرہ ٹی وی نے حوثی فوج کے ترجمان یحییٰ ساریہ کے بیان کا حوالہ دیتے ہوئے بتایا کہ جمعرات کے روز صبح کے وقت سعودی شہر خمیس مشیط کے ایئربیس پر کیے جانیوالے حملے میں ہدف کو درست طور پر نشانہ بنایا گیا۔

تاہم سعودی زیر ملکیت العربیہ ٹی وی نے بتایا کہ سعودی زیر قیادت اتحاد نے خمیس مشیط کی طرف بھیجے گئے حوثی ملیشیاء کے ایک ڈرون کو روک کر تباہ کر دیا ہے۔

حوثیوں نے حال ہی میں سعودی شہروں اور تیل کی سہولیات پر سرحد پار سے میزائل اور ڈرون حملے تیز کر دیئے ہیں ۔مبینہ طور پر ان میں سے بیشتر حملوں کو اتحاد نے ناکام بنا دیا ہے۔

یمن 2014 کے بعد سے ہی خانہ جنگی کی لپیٹ میں ہے جب ایرانی حمایت یافتہ حوثی ملیشیاء نے ملک کے متعدد شمالی صوبوں پر قبضہ کرکے بین الاقوامی سطح پر تسلیم کردہ صدر عبد ربہ منصور ہادی کی حکومت کو دارالحکومت صنعاء سے نکلنے پر مجبور کر دیا تھا۔

سعودی قیادت میں عرب اتحاد نے 2015ء میں ہادی حکومت کی حمایت کیلئے یمنی تنازعہ میں مداخلت کی تھی۔