سلمان رشدی کیلئے ڈیٹن لٹریری پیس پرائز لائف ٹائم اچیومنٹ ایوارڈ

لندن (ڈیلی اردو/بی بی سی) معروف بھارتی نژاد برطانوی مصنف سلمان رشدی کو اتوار کے روز ڈیٹن لٹریری پیس پرائز کی تقریب میں لائف ٹائم اچیومنٹ ایوارڈ سے نوازا گیا۔ 

تین سال قبل نیویارک میں ایک چاقو حملے میں زخمی ہو جانے کے بعد سلمان رشدی پہلی بار ایک بڑی اعزازی تقریب کا حصہ بنے۔

یہ ایوارڈ ہر سال ان ادیبوں کو دیا جاتا ہے جو ادب کے ذریعے امن کے فروغ میں کردار ادا کرتے ہیں۔ اوہائیو کا شہر ڈیٹن وہ مقام ہے، جہاں 1995 میں ہونے والے مذاکرات نے بلقان کی جنگ کا خاتمہ کیا تھا۔ 

بلقان جنگ میں تین لاکھ سے زائد افراد مارے گئے تھے جبکہ قریب10 لاکھ بے گھر ہوئے تھے۔

اٹھہتر سالہ رشدی اپنے ناول  The Satanic Verses  یا شیطانی آیات کے سبب دنیا بھر میں مشہور ہوئے تھے۔ 

اس کتاب نے 1989 میں آیت اللہ خمینی کے فتوے کے بعد ان کی زندگی کو خطرے میں ڈال دیا تھا اور وہ کئی برس خفیہ زندگی گزارنے پر مجبور ہوئے تھے۔

2022  میں نیویارک میں ایک تقریب میںسلمان رشدی کو ایک چاقو حملے کے ذریعے نشانہ بنایا گیا۔ اس حملے میں رشدی ایک آنکھ سے محروم ہو گئے، جبکہ حملہ آور کو 25 سال قید کی سزا سنائی گئی۔

ایوارڈ قبول کرتے ہوئے رشدی نے کہا کہ آج کے دور میں جب دنیا یوکرین، غزہ اور سوڈان جیسے ’’ناقابلِ معافی تشدد‘‘ سے گزر رہی ہے، ایسے میں امن پر لکھنا مشکل ہے۔

انہوں نے کہا، ’’ایک کتاب گولی نہیں روک سکتی اور ایک نظم بم کا خاتمہ نہیں کر سکتی، مگر ادب کے ذریعے ہم مظلوموں سے یکجہتی کا اظہار کر سکتے ہیں۔‘‘