سندھ: نوشہروفیروز میں پولیس چوکی پر مسلح افراد کی فائرنگ، 2 اہلکار ہلاک

نوشہروفیروز (نمائندہ ڈیلی اردو) پاکستان کے صوبہ سندھ کے ضلع نوشہروفیروز میں مسلح افراد نے بھریا روڈ کے قریب واقع پولیس چوکی پر فائرنگ کر دی، جس کے نتیجے میں دو پولیس اہلکار ہلاک ہو گئے۔

پولیس کے مطابق فائرنگ کا واقعہ بھریاروڈ تھانے کی حدود میں ٹیل نہر پولیس چوکی پر پیش آیا، جہاں اہلکار نائٹ ڈیوٹی پر تعینات تھے۔ فائرنگ کے نتیجے میں اہلکار سعید سولنگی اور غلام حسین راجپر موقع پر ہی ہلاک ہو گئے۔

واقعے کے بعد حملہ آور موقع سے فرار ہونے میں کامیاب ہو گئے جبکہ پولیس نے علاقے کو گھیرے میں لے کر سرچ آپریشن شروع کر دیا ہے۔ ہلاک اہلکاروں کی لاشیں پوسٹ مارٹم کے لیے قریبی اسپتال منتقل کر دی گئی ہیں۔

پولیس حکام کا کہنا ہے کہ واقعے کی تفتیش شروع کر دی گئی ہے۔