سوات میں سیکورٹی فورسز کا آپریشن،مسجد سے خودکش جیکٹس اور بارودی مواد برآمد

سوات (نمائندہ ڈیلی اردو) صوبہ خیبر پختونخوا کے ضلع سوات کے علاقے خوازہ خیلہ کے گاؤں پیرگانو بانڈہ میں پولیس اور سیکیورٹی فورسز نے انٹیلیجنس اداروں کی بروقت اطلاع پر مشترکہ کارروائی کرتے ہوئے دہشت گردی کی ایک بڑی کوشش ناکام بنا دی۔

سیکیورٹی ذرائع کے مطابق کارروائی کے دوران ایک مسجد سے بھاری مقدار میں تخریبی مواد برآمد کیا گیا، جس میں خودکش جیکٹس، بارودی تھیلیاں، ریموٹ کنٹرول، ٹرانسمیٹرز اور بال بیئرنگز شامل تھے۔ حکام کا کہنا ہے کہ یہ تمام اشیاء ممکنہ طور پر کسی بڑے حملے میں استعمال کی جانی تھیں۔

ذرائع کا مزید کہنا ہے کہ دہشت گردوں نے یہ مواد خفیہ طور پر مسجد کے اندر چھپا رکھا تھا، تاہم انٹیلیجنس اداروں کی مستعدی اور سیکیورٹی فورسز کی فوری کارروائی کے باعث ممکنہ تباہی سے بچا لیا گیا۔

فورسز نے علاقے کو گھیرے میں لے کر سرچ آپریشن اور تفتیش کا آغاز کر دیا ہے۔ مقامی افراد نے فورسز کی بروقت کارروائی کو سراہتے ہوئے اسے ایک اہم کامیابی قرار دیا ہے۔

واضح رہے کہ 18 اپریل کو بھی سوات میں سیکیورٹی فورسز نے کارروائی کرتے ہوئے 4 دہشت گردوں کو ہلاک کر دیا تھا۔ اس آپریشن کے دوران بھی بھاری مقدار میں اسلحہ اور گولہ بارود برآمد کیا گیا تھا۔

سیکیورٹی ادارے اس عزم کا اظہار کر رہے ہیں کہ عوام کے تحفظ کے لیے ایسے آپریشنز جاری رہیں گے اور دہشت گردی کی ہر کوشش کو ناکام بنایا جائے گا۔