سوڈان: نماز جمعہ کے دوران الفاشر کی مسجد پر ڈرون حملہ، 75 ہلاک

خرطوم (ڈیلی اردو/نیوز ایجنسیاں ) سوڈان کی نیم فوجی ریپڈ سپورٹ فورسز (آر ایس ایف) نے جمعے کو مغربی شہر الفاشر میں ایک مسجد پر ڈرون حملہ کیا، جس کے نتیجے میں کم از کم 75 افراد ہلاک ہو گئے۔

فوری امدادی ٹیموں کے مطابق یہ حملہ ایسے وقت میں کیا گیا جب آر ایس ایف دارفور کے وسیع مغربی علاقے میں سوڈانی فوج کے زیر انتظام آخری بڑے شہر پر قبضے کی کوششیں تیز کر رہی تھی۔ یہ حملہ شہر کے الدرجہ محلے میں واقع ایک مسجد پر ہوا۔ ’ابو شوق ایمرجنسی رسپانس روم‘ نے جاری کردہ بیان میں بتایا کہ، ’’لاشوں کو مسجد کی عمارت کے تباہ شدہ حصوں سے نکال لیا گیا ہے۔‘‘

اس واقعے پر آر ایس ایف کی جانب سے فوری طور پر کوئی ردعمل سامنے نہیں آیا۔

الفاشر، جو تقریباً 18 ماہ سے محاصرے میں ہے، دارفور کی ریاست کا دارالحکومت ہے اور سوڈان کی فوج کے کنٹرول میں رہنے والا آخری بڑا شہر بھی ہے۔ سوڈان کی فوج اپریل 2023ء سے آر ایس ایف کے ساتھ جاری تباہ کن جنگ میں مصروف ہے۔

سوڈان میں جاری خانہ جنگی اب تیسرے سال میں داخل ہو چکی ہے، جس کے دوران ہزاروں افراد ہلاک اور تقریباً 12 ملین لوگ بے گھر ہو چکے ہیں۔ اس خانہ جنگی نے ملک کو تقسیم کر دیا ہے، جہاں سوڈانی فوج نے شمال، مشرق اور وسطی علاقوں پر کنٹرول حاصل کر رکھا ہے، وہیں ریپڈ سپورٹ فورسز نے جنوب اور دارفور کے بیشتر حصوں پر قبضہ کر لیا ہے۔