سہ فریقی اجلاس: دہشت گردی کیلئے زرخیز زمین کو ختم کرنا ضروری ہے، چین

کابل + بیجنگ (ڈیلی اردو/شِنہوا/نیوز ایجنسیاں) چینی وزیر خارجہ وانگ ژی نے پاکستان اور افغانستان پر زور دیا ہے کہ وہ سہ فریقی تبادلوں کو مضبوط کریں تاکہ علاقے میں سکیورٹی کو بہتر بنایا جا سکے۔ وانگ، جو بدھ کو کابل میں اپنے ہم منصبوں کے ساتھ سہ فریقی اجلاس میں شریک ہوئے، نے کہا کہ ممالک کو اسٹریٹیجک باہمی اعتماد بڑھانے اور سکیورٹی تعاون مضبوط کرنے کی ضرورت ہے۔

چین نے اس بات پر زور دیا کہ دہشت گردی کے لیے زرخیز زمین ختم کرنا ضروری ہے۔ وانگ نے کہا کہ سکیورٹی ڈائیلاگ میکانزم کو بہتر بنانا، قانون نافذ کرنے والے اداروں اور سکیورٹی تعاون کو مضبوط کرنا اور بین الاقوامی دہشت گردانہ سرگرمیوں کے خلاف لڑائی کو بڑھانا لازمی ہے۔

چینی سرکاری میڈیا شِنہوا کے مطابق وانگ نے افغانستان کے قائم مقام وزیر خارجہ امیر خان متقی کے ساتھ ملاقات میں ایسٹ ترکستان اسلامی تحریک کا ذکر بھی کیا اور امید ظاہر کی کہ افغانستان دہشت گرد قوتوں سے نمٹنے کے لیے اپنی کوششیں تیز کرے گا۔

بیان میں چین نے واضح کیا کہ وہ ہر ملک کے بنیادی مفادات کو سمجھنے اور سپورٹ کرنے کے لیے تیار ہے اور بیرونی مداخلت یا کسی بھی فرد یا تنظیم کے ذریعے قومی خودمختاری کمزور کرنے کی سخت مخالفت کرتا ہے۔

وانگ نے تینوں ممالک سے ترقیاتی تعاون، تجارت، سرمایہ کاری اور نیٹ ورک رابطوں کو بڑھانے کا بھی کہا۔ چین کا پاکستان کے ساتھ 596 کلومیٹر اور افغانستان کے ساتھ 92 کلومیٹر طویل سرحد ہے۔