سی ٹی ڈی کی لاہور میں بڑی کارروائی، لشکر طیبہ کے کمانڈر ذکی الرحمان لکھوی گرفتار

لاہور (ڈیلی اردو) کاؤئنٹر ٹیرارزم ڈیپارنمنٹ نے لاہور میں کارروائی کرتے ہوئے کالعدم تنظیم لشکر طیبہ کے اہم کمانڈر کو گرفتار کرلیا ہے۔

سی ٹی ڈی ذرائع کے مطابق ملزم کو دہشت گردوں کی مالی معاونت پر گرفتار کیا گیا ہے، ملزم کی شناخت ذکی الرحمان لکھوی کے نام سے کی گئی ہے، جس کے خلاف سی ٹی ڈی لاہور اسٹیشن میں مقدمہ درج ہے۔

تفصیلات کے مطابق کاؤئنٹر ٹیرارزم ڈیپارنمنٹ پنجاب نے خفیہ اطلاع پر کارروائی کرتے ہوئے ممبئی حملہ سازش کے مرکزی ملزم ذکی الرحمان لکھوی کو دہشت گردی کی فنڈنگ کے الزام میں گرفتار کرلیا۔

کالعدم تنظیم لشکر طیبہ کے اہم کمانڈر ذکی الرحمان لکھوی جماعت الدعوۃ کے سربراہ حافظ محمد سعید کے قریبی ساتھی بھی ہیں۔

سی ٹی ڈی تھانہ لاہور میں درج دہشت گردی کی فنڈنگ کے مقدمے میں ان کی گرفتاری عمل میں آئی۔ ان پر الزام ہے کہ ڈسپنسری چلانے کی آڑ میں دہشت گردی کے لیے فنڈز جمع کرتے رہے جنہیں دہشت گردی کی کارروائیوں اور ذاتی اخراجات کے لیے استعمال کیا۔

ان کا نام اقوام متحدہ کی دہشت گردوں کی فہرست میں بھی شامل ہے۔

ترجمان سی ٹی ڈی پنجاب کے مطابق ذکی الرحمان لکھوی پر لاہور کی انسداد دہشت گردی عدالت میں دہشت گردوں کی مالی معاونت کا کیس چلایا جائے گا۔