سیالکوٹ: ڈسکہ میں زیادتی کا شکار بچے کی ہاتھ پاؤں بندھی لاش برآمد

سیالکوٹ (ڈیلی اردو) صوبہ پنجاب کے ضلع سیالکوٹ کی تحصیل ڈسکہ میں کھیتوں سے بچے کی ہاتھ پاؤں بندھی لاش برآمد ہوئی ہے۔

تفصیلات کے مطابق دل خراش واقعہ سیالکوٹ کی تحصیل ڈسکہ میں جیسر والہ میں پیش آیا ہے، جہاں کھیتوں سے ایک بچے کی لاش برآمد ہوئی ہے، پولیس نے بچے کو زیادتی کے بعد قتل کئے جانے کے خدشے کا اظہار کیا ہے۔

پولیس کا موقف ہے کہ آٹھ سالہ بچہ گذشتہ روز اغوا کیا گیا تھا۔

میڈیا پر خبر نشر ہونے پر وزیراعلیٰ پنجاب نے واقعے کا نوٹس لیتے ہوئے آرپی او گوجرانوالہ سے فوری رپورٹ طلب کرلی ہے۔

ڈی پی او سیالکوٹ کے مطابق بچے کو ممکنہ طور پر بدفعلی کے بعد قتل کیا گیا ہے، بچے کی لاش کو اسپتال منتقل کرکے کارروائی کا آغاز کردیا گیا ہےجلد ملزمان کو گرفتار کرلیا جائے گا۔

دوسری جانب آٹھ سالہ سبحان کے ورثا نے قتل کیخلاف احتجاج کرتے ہوئے ڈسکہ سیالکوٹ روڈ بلاک کردی ہے، جس کے باعث سیالکوٹ کا لاہور اور دیگر شہروں سے رابطہ کٹ گیا ہے۔