سینیٹر علامہ راجہ ناصر عباس کی زیرِ تعمیر یونیورسٹی کو کالعدم ٹی ٹی پی کی جانب سے دھمکی

اسلام آباد (ڈیلی اردو) پاکستان تحریک انصاف (پی ٹی آئی) کی جانب سے سینیٹ میں نامزد قائدِ حزبِ اختلاف سینیٹر علامہ راجہ ناصر عباس کی زیرِ تعمیر یونیورسٹی کو کالعدم دہشت گرد تنظیم تحریک طالبان پاکستان (ٹی ٹی پی) سے منسلک ایک گروہ کی جانب سے دھمکی موصول ہوئی ہے۔

ڈیلی اردو کے مطابق سوشل میڈیا پر یونیورسٹی کو نشانہ بناتے ہوئے ایک تصویر جاری کی گئی، جس کے بعد مجلس وحدت المسلمین (ایم ڈبلیو ایم) نے شدید ردعمل کا اظہار کیا ہے۔

ایم ڈبلیو ایم کی جانب سے جاری بیان میں کہا گیا ہے کہ وفاقی دارالحکومت میں ہائی الرٹ سیکیورٹی، پولیس ناکوں اور سخت حفاظتی انتظامات کے باوجود کسی مبینہ دہشت گرد کا حساس مقام تک پہنچنا اور وہاں سے تصاویر بنا کر سوشل میڈیا پر جاری کرنا نہایت تشویشناک اور ریاستی سیکیورٹی کے لیے سنگین سوالیہ نشان ہے۔

ترجمان مجلس وحدت المسلمین کا کہنا تھا کہ حساس مقامات تک دہشت گرد عناصر کی بلا روک ٹوک رسائی اور کھلے عام دھمکیوں کا اجرا ناقابلِ قبول ہے۔ انہوں نے مطالبہ کیا کہ اسلام آباد پولیس اور متعلقہ سیکیورٹی ادارے اس واقعے کا فوری نوٹس لیں، ذمہ دار عناصر کی نشاندہی کریں اور انہیں قانون کے کٹہرے میں لایا جائے۔

ایم ڈبلیو ایم نے سینیٹر علامہ راجہ ناصر عباس جعفری سمیت تمام عوامی نمائندوں اور شہریوں کو مؤثر اور یقینی سیکیورٹی فراہم کرنے کا بھی مطالبہ کیا ہے۔

دوسری جانب ذرائع کے مطابق سینیٹر علامہ راجہ ناصر عباس جعفری کی زیرِ تعمیر یونیورسٹی کو نشانہ بنانے کی آن لائن دھمکی کالعدم ٹی ٹی پی کے ضلع کرم میں سرگرم کاظم گروپ سے منسوب ایک شخص کی جانب سے دی گئی، جس نے اسلام آباد کے سترہ میل کے علاقے سے ایک تصویر سوشل میڈیا پر شیئر کی، جس میں یونیورسٹی پر ٹارگٹ کا نشان ظاہر کیا گیا۔

ذرائع کا کہنا ہے کہ مذکورہ شخص ماضی میں بھی ایسی دھمکیاں دیتا رہا ہے، جبکہ بعض مواقع پر ان دھمکیوں کے بعد متعلقہ گروہ کی جانب سے عملی کارروائیاں بھی رپورٹ ہو چکی ہیں، تاہم ان دعوؤں کی آزادانہ طور پر تصدیق نہیں ہو سکی۔

پولیس ذرائع کے مطابق مذکورہ شخص مبینہ طور پر شیعہ ٹارگٹ کلنگ اور تین افراد کو ذبح کرنے کے واقعات سمیت سیکیورٹی فورسز پر حملوں میں بھی مطلوب رہا ہے، تاہم اس حوالے سے تحقیقات جاری ہیں۔

سیکیورٹی ذرائع کے مطابق واقعے کے بعد متعلقہ اداروں نے معاملے کا نوٹس لیتے ہوئے تحقیقات شروع کر دی ہیں۔