شام میں اسرائیلی فوج تعینات

نیو یارک + دمشق + غزہ + صنعا (ڈیلی اردو) اقوام متحدہ کے خصوصی ایلچی برائے شام، گیر پیڈرسن نے اسرائیل سے مطالبہ کیا ہے کہ وہ شام میں جاری فضائی حملے فوراً بند کرے۔ ہفتے کے روز جاری کردہ ایک بیان میں انہوں نے اسرائیلی کارروائیوں کو شام کی خودمختاری اور بین الاقوامی قوانین کی کھلی خلاف ورزی قرار دیا۔

پیڈرسن نے ایکس پر کہا، “میں دمشق اور دیگر شہروں میں اسرائیل کی جانب سے کیے گئے متعدد فضائی حملوں کی شدید مذمت کرتا ہوں۔ اسرائیل کو چاہیے کہ وہ شامی شہریوں کی جانوں کو خطرے میں ڈالنا بند کرے اور شام کی خودمختاری، اتحاد اور علاقائی سالمیت کا احترام کرے۔”

اسرائیلی افواج کی شامی سرزمین پر موجودگی

اسرائیلی دفاعی افواج (IDF) نے تصدیق کی ہے کہ اس کے دستے جنوبی شام میں تعینات ہیں۔ اسرائیلی فوج کے مطابق، فرقہ وارانہ کشیدگی کے بعد دروز اقلیت کی حفاظت کے لیے یہ اقدام اٹھایا گیا ہے۔ تاہم یہ واضح نہیں کیا گیا کہ آیا یہ نئی تعیناتی ہے یا پہلے سے موجود دستوں میں اضافہ کیا گیا ہے۔

یمن سے اسرائیل پر میزائل حملہ

ہفتے کے روز اسرائیلی فوج نے دعویٰ کیا کہ اس نے یمن سے داغا گیا ایک بیلسٹک میزائل فضا میں ہی تباہ کر دیا۔ یہ دو دنوں میں ایران نواز حوثی باغیوں کی جانب سے تیسرا حملہ تھا۔ حوثی گروپ کے ترجمان یحییٰ سریع نے ایک ویڈیو پیغام میں کہا کہ ایک ہائپر سونک میزائل سے اسرائیل کے وسطی علاقے میں ایک فوجی تنصیب کو نشانہ بنایا گیا۔

حوثی باغی غزہ میں اسرائیلی کارروائیوں کے خلاف ردعمل کے طور پر بحیرہ احمر اور خلیج عدن میں تجارتی جہازوں کو بھی نشانہ بنا چکے ہیں۔ مارچ کے بعد امریکی افواج نے ان حملوں کے جواب میں حوثی اہداف پر روزانہ فضائی کارروائیاں شروع کر رکھی ہیں، جن میں اب تک 1,000 سے زائد مقامات کو نشانہ بنایا جا چکا ہے۔

غزہ پر تازہ حملے، نومولود بچوں سمیت 11 افراد ہلاک

غزہ کی سول ڈیفنس ایجنسی کے مطابق، ہفتے کی رات اسرائیلی فضائی حملے میں خان یونس کے پناہ گزین کیمپ پر بمباری کے نتیجے میں کم از کم 11 افراد ہلاک ہو گئے، جن میں تین نومولود بچے بھی شامل ہیں۔ اسرائیلی فوج نے اس حملے پر کوئی ردعمل نہیں دیا۔

اسرائیل نے 18 مارچ کو دو ماہ کی جنگ بندی کے بعد دوبارہ غزہ پر عسکری کارروائیاں شروع کی تھیں اور ساتھ ہی امدادی سامان کی ترسیل بھی روک دی ہے۔ اسرائیل کا کہنا ہے کہ امدادی سامان حماس کے ہاتھ لگ رہا ہے، جس کی وجہ سے عام شہریوں تک رسائی ممکن نہیں ہو پا رہی۔

غزہ میں انسانی بحران شدت اختیار کر گیا

اقوام متحدہ نے خبردار کیا ہے کہ غزہ میں انسانی بحران تیزی سے قحط میں تبدیل ہو رہا ہے۔ مکمل ناکہ بندی، بنیادی سہولیات کی قلت اور بڑے پیمانے پر بے گھر آبادی کی وجہ سے علاقے میں انسانی المیہ جنم لے رہا ہے۔ اقوام متحدہ کی ایجنسیوں نے اسرائیل سے مطالبہ کیا ہے کہ وہ امدادی رکاوٹیں ختم کرے۔

تنازعے کی جڑ: 7 اکتوبر کا حملہ

غزہ میں حالیہ تنازعہ 7 اکتوبر 2023 کو شروع ہوا تھا، جب حماس نے اسرائیل پر بڑا حملہ کیا، جس میں 1,200 افراد ہلاک ہوئے اور 250 سے زائد افراد کو یرغمال بنا لیا گیا۔ جواباً اسرائیل نے غزہ میں حماس کے خلاف شدید فضائی، بحری اور زمینی حملے شروع کر دیے، جن میں اب تک فلسطینی ذرائع کے مطابق 52,000 سے زائد افراد ہلاک ہو چکے ہیں۔