شمالی وزیرستان: مدرسے سے لاپتہ ہونیوالے بچے کی تشدد زدہ لاش برآمد، دونوں ہاتھ، پاؤں جسم سے جُدا کردیئے گئے

میران شاہ (ڈیلی اردو/ٹی این این) صوبہ خیبر پختونخوا کے قبائلی ضلع شمالی وزیرستان میں دینی مدرسے سے لاپتہ ہونے والے کمسن بچے کی تشدد زدہ لاش مل گئی۔

پولیس کے مطابق میرعلی کے گاؤں ہرمز کے دینی مدرسے سے لاپتہ ہونے والے 8 سالہ یحییٰ کی لاش منگل کو زیرکی گاؤں سے ملی ہے۔

یحییٰ کے والد عابد نور نے پولیس کو بتایا ہے کہ میرعلی کے مچی خیل گاؤں سے تعلق رکھنے والا بچہ ایک ہفتہ قبل وظیفہ جمع کرنے کی غرض سے مدرسے سے باہر گیا تھا اور شام کے بعد واپس مدرسہ نہیں آیا۔

انہوں نے بتایا کہ آج بچے کی مسخ شدہ لاش ملی ہے اور بچے کے دونوں ہاتھ پاؤں کاٹ دئے گئے ہیں۔

دوسری جانب پولیس نے پوسٹ مارٹم کرنے کے بعد بچے کی نعش لواحقین کو سونپ دی اور واقعے کی تفتیش شروع کردی۔